Urgent Care Aruba awo ta conta cu Servicio di Ecografia/ Ultrasound

Cu hopi orguyo Urgent Care Aruba (UCA) ta anuncia henter comunidad di Aruba cu despues di hopi esfuerzo, dedicacion y un inversion den un equipo di ultimo tecnologia, finalmente por ofrece comunidad di Aruba servicio priva di ultrasonido (Ecografia).
Actualmente ultrasonido y otro metodonan di diagnostico door di imagen ta wordo considera manera un pilar fundamental na e prome linja di atencion di e pashent pa detecta malesanan agudo y maneho di malesanan cronico.

Ecografia
Ecografia ta un estudio unda ta manda ondanan sonico cu ora nan ta pasa door di e diferente organonan di curpa ta wordo captura manera imagen cu ta wordo mira mesora den un screening . Na Urgent Care Aruba (UCA) e dokter radioloog ta haci e procedura di ecografia y tambe ta haci e interpretacion mesora. E bentaha di esaki ta cu e pashent ta haya su diagnostico mesora. E dokter cu ta lesa e imagen nan aki ta un dokter specialisa, y ta debidamente registra na Departamento Salud Publico di Aruba.
“Hopi hende mester acceso na un ecografia pa diferente motibo: e ta un estudio economico si ta wordo compara cu otro estudionan, no ta invasivo door cu no ta usa radiacion ionizante.” segun e Director General di Urgent Care Aruba, Dr. Carlos Yagua Jr. “Pa medio di dje por logra valora e diferente organonan di curpa manera tiroide, screening di pecho, higra, galblaas, pancreas, nier, matris y ovario y prostata entre otro.”

Ultimo tecnologia
Urgent Care Aruba (UCA) na Centro Medico Noord, a percura pa pone den funcionamento un unidad di ecografia di ultimo tecnologia esaki cu finalidad di ofrece un servicio integral, mas eficiente pa e pashentnan y pa dokternan por jega na un diagnostico oportuno.
E strategia general di servicio di imagenan ta centra den un obhetivo fundamental: duna e miho atencion posible na e usuarionan den un marco di servicio di calidad y adecua na e normanan internacional actual. Di e manera aki Urgent Care Aruba (UCA) ta crea un cultura di mehoramiento continuo den e maneho di tur su procesonan. Tambe ta sigura cu e servicio duná na su clientenan ta satisface e requisitonan y expectativanan door di excelencia continuo.

Accesible y Oportuno
No mester siman of luna nan pa haci un cita, e pashent por acudi na e centro y riba e mesun dia e por haya e servicio. Tambe e persona mes por dicidi un ora y dia cu ta cai conveniente p’e. E departamento ta disponible pa henter comunidad di dialuna pa diasabra y den caso nan necesario cu mester haci un ecografia e centro lo ta disponible despues di ora nan di trabao.
E pashent lo haya un reporte medico detaya emiti door di e dokter radioloog unda tin splicacion di e studio haci.
E prijs di studio aki ta uno hopi accesibel, di e manera aki UCA ta reafirma su compromiso di servicio pa henter comunidad di Aruba.

Urgent Care Aruba
Ta apenas 5 aña pasa cu Urgent Care Aruba (UCA) situa na Centro Medico Noord, a wordo instituí como un concepto nobo den servicio pa trata casonan di urgencia y asina asisti turistanan y localnan den nan necesidad di atencion medico.
E servicio di atencion medico cu UCA ta brinda tin di haber ora cu e pashent ta sinti su mes malo y su condicion medico no ta asina grave cu mester acudi eerste hulp y e ta prefera no warda te mañan pa un consulta of un control medico.

Contacto
Pa mas informacion tocante prijs por comunica na telefon: +297-5860448. Of bishita e website: www.urgentcare.aw of Facebook page: Urgent Care Aruba.

Comments

comments