Den un conferencia di prensa yama pa ambos partido, lider di PPA, Benny Nisbet a expresa cu esaki ta un atardi importante cu ta spera cu por tin un impacto hopi positivo riba e eleccion di dia 22 di September proximo.
Pa prepara un partido pa bay eleccion no ta algo facil y sa tambe cu ora cu tin 10 partido politico bayendo eleccion, e ta bira hopi mas dificil, segun lider di PPA, Benny Nisbet. E problematica cu partidonan politico ta tene cuenta cun’e, ta grandemente basa riba e situacion cu pais Aruba ta aden. Pais Aruba ta den un crisis financiero, economico y social cu ta pidiendo solucion. Aruba merece alternativanan serio pa por tuma e decision corecto. Di parti di PPA y di UPP, a dicidi pa sinta hunto y combersa durante varios encuentro, pa por analisa y mira si tin e base, e fundeshi necesario pa ambos partido lo por combina un lista pa e proximo eleccion. E reunionnan ey a bay den un ambiente positivo. A repasa varios parti di e programa di cada ken. Pero si tin cu continua riba e materia aki y a papia riba e principionan basa riba cual por a yega na otro pa bay eleccion cu un lista combina. Y a anuncia tambe cu tanto PPA como UPP a yega na un acuerdo y e intencion ta pa diabierna proximo entrega un lista combina pa asina duna pueblo di Aruba un lista mucho mas fuerte, un lista cu ta tene cuenta cu bienestar general di Aruba den tur sentido di Palabra y hiba Aruba pa e proximo nivel y ofrece Aruba un miho porvenir, pa asina pueblo di Aruba mira seriedad su dilanti.
primeramente locual cu ta ofrece na e pueblo di Aruba, ta experiencia. Ambos partido tin figuranan riba dje cu tin un experiencia enorme den politica di Aruba y e realidad di bida ta, cu ora bo tin un crisis asina grandi ta colga riba pueblo, cu e prome aspecto cu bo tin cu tene cuenta cun’e ta unda bo ta haya politiconan cu experiencia cu por yuda salba e comunidad di Aruba.