Relaciona cu e reunion di Parlamento tocante e posicion di Paul Croes, UPP mester bisa di a keda totalmente desapunta den henter e reunion, tanto di parti di gobierno y e parlamentarionan. Desde comienso di e reunion, na momento cu fraccion di AVP a bin cu un di dos punto di agenda, di cual e procedura pa pone e di dos punto aki ta cuestionabel, tambe di parti di Presidente di Parlamento, tabata mustra di lo a bira un reunion di tiramento di lodo. E resultado di e reunion aki mas bien ta cu nos Gobierno y e parlamentarionan cu ta sostene Gobierno, ta fomenta desigualdad entre ciudadanonan aki na Aruba.
E curso di e reunion a bira predicibel na momento cu e promer orador di AVP a trece su puntonan, door di bisa cu e no ta bay papia riba e caso di sr. Paul Croes pasobra e ta bou di investigacion, pero si kier a bay papia riba un otro caso cu TAMBE ta bou di investigacion. Esaki nos yama falta di consistencia politico of un politica di dobbel standard. Esaki a haci tambe cu nos Parlamento a bira un circo completo unda a bay over na gritamento y insulto uno na otro. Mientras cu e topico mes no a haya e atencion debido, cu e resultado cu awe nos comunidad ta cu e mesun dudanan pa loke ta trata e posicion di sr. Paul Croes.
Responsabilisacion no a bin tampoco di parti di Gobierno pa su posicion tuma pa cu e minister en cuestion. Minister Mike Eman, pa 5 minuut a bay riba un tour estatal, pero usando ehempel di St. Maarten, cu hustamente tin un KB aworaki y un Camara di Integridad impone riba dje.
Sr. Mike Eman a bay sconde tras di un peticion haci na DWJZ pa propone cambio di ley den e tipo di asunto aki a la St. Maarten. Di e manera aki sr. Eman a trata na hustifica e decision di Gobierno pa permiti sr. Paul Croes keda den funccion, pero na cas.
Pregunta di UPP ta: pakico awor kier cambia esaki? Pakico no a haci di 7 aña pasa? Kisas ta pasobra cu awor un minister a haya su mes meti den cosnan cu ta anti-constitucional segun nos leynan y cu ta contra di nos codigo penal? Cambionan cu bin asina, nos ta yama “gelegenheidswetgeving”. Y esaki no ta na bienestar di nos democracia, nos estado di derecho, ni tampoco nos normanan di fatsoen. Sr. Paul Croes mester a tuma su retiro, y punto.
Si esaki no tabata e caso, anto Gabinete Mike Eman II, cu na cabes e minister responsabel esta Mike Eman, mester a convence e minister di esaki. Of, den e ultimo trayecto, Parlamento di Aruba, e guardian di nos constitucion y di nos sistema legal di un pais drechi, mester a percura pa duna sr. Paul Croes su retiro. Pero nos sistema ta keda faya, danki na un Parlamento cu a degrada su mes na un instrumento poltico di sr. Mike Eman y su Gobierno. Esaki ta e tristesa mas grandi cu nos por a mira ayera como resultado. E tipo di actitud aki di complacencia, ta haci tambe cu nos ciudadanonan mas y mas no ta kere den nos sistema. Nan no tin confiansa mas, y por trece cun’e cu nos sistema ta wordo uza segun antoho di esnan na mando, particularmente ora bo tin un mayoria absoluto, e hegemonia di un solo partido. Di e forma aki creando un sistema arbitrario, na unda ta depende cu ken bo ta, y ki posicion bo tin, bo ta haya bo trato. E pueblo comun si lo no haya un trato asina. Pues nos ta crea un trato discriminatorio y desigual. Pesey UPP ta para pa un cambio fundamental den nos sistema di representacion y eleccion, mescos tambe di gobernacion.
Bo tin cualkier remarca, sugerencia, pregunta etc., por tuma contacto cu partido UPP na [email protected].