Despues di a scucha declaracionnan di minister Dowers y ehecutivonan den e cadena di combatimento di criminalidad, UPP a yega na e conclusion cu realmente nos pais ta den un problema basta grandi pa loke ta nos nivel di criminalidad.
Nos por constata varios motibonan cu a conduci na esaki. Entre otro un free for all den entrada di stranheronan sin ningun tipo di control adecuado. Legalisacion di hendenan cu a drenta Aruba na un forma ilegal. Falta di placa pa polis por haci nan trabou debidamente, manera nos por tuma nota di e declaracionnan haci door di Dowers den direccion di Otmar Oduber. Y e dealmento cu hendenan di baho mundo dor di ex minister Oduber, manera Dowers, despues di a braza su ex-colega pa mas di 7 aña ta bin basha abou riba dje.
Ta hopi lamentabel y inaceptabel cu un minister di husticia, despues di mas di 7 aña cu e cosnan aki ta sosodiendo ta bin habri afo. Y segun su propio declaracion, cu e tin hopi mas cos pa papia. Awor ta bin na cla cu droga ta wordo bendi y uza na gran escala na festivalnan, na unda pa colmo minister Dowers mes ta presente. Conclusion den esaki ta cu e criminalnan eyfo tin un competencia masha grandi cu nos propio gobernantenan. E percepcion aki Dowers y su Gobierno a crea cerca criminalnan. Es mas e no mester lubida, cu no ta pornada tin un dicho ta bisa cu “ora cubo drumi cu cacho no keda straño cu bo lanta cu purga.”
UPP ta kere cu ta tempo pa Aruba haya un Gobierno cu tin reglanan formula y basa riba Bon Gobernacion. Esaki lo percura tambe pa un plan integral pa combatimento di criminalidad. Na unda tapamento di cosnan pa colega hamas por ta forma parti, manera cu a bin ta pasa na e momentonan aki.
Manera treci dilanti caba, un di e motibonan cu a hiba nos na e ola di criminalidad cu tin awor aki na Aruba ta e maneho di “Open Door” y “Free for All” cu a ser hiba desde november 2009, na unda ken cu ta ta drenta y cu ken cu ta, ta haya permiso sin ningun tipo di screening. Ta pesey UPP a bisa caba cu mester bin back cu e maneho estricto cu a ser hiba entre November 2005 pa 31 di October 2009, na unda tabata tin un maneho di “ZERO coruption” y sin excepcion. Y re-introduccion di e modelo Suiso mester bin back manera e ley ta perscirbi. Alabes mester sera e fronteranan na un manera hermetico pa evita cu por tin entrada di hende y/o producto na un manera ilegal.
Nos a bisa caba den un otro articulo cu mester bin postnan na cierto puntonan cu ta conoci na unda esaki ta pasa, pero tambe UPP ta kere cu no por tin mucho fragmentacion den e combatimento den tipo di practicanan. Mester bin un organo especial pa combati tipo cosnan aki, na unda Guarda Costa, Polis Maritimo y Guarda nos Costa por traha hunto y cu ta haya toolnan necesario pa hasi nan trabou debidamente.
Alabes den pasado tabata tin un radar y esaki mester bin bek, mientras mester bin cu otro tipo di tecnologia moderno cu ya ta wordo uza otro caminda di mundo, cu por sigui movementonan for di riba tera como lama. E aparatonan aki por cubri un area basta grandi, mientras no ta trata di algo mucho costoso tampoco, pero cu ta hopi efectivo. Un otro technologia cu por wordo uza, ta e ponemento di camara na varios sitio aki na Aruba pa pueblo por tin e sentimento cu por medio di esakinan nan ta wordo protegi.
Pues UPP no ta critica so pero ta bin cu ideanan realistico cu lo por conduci na drecha e situacion. Cu e maneho ariba perscirbi a hinca Aruba den un abismo y UPP ta cla pa e reto pa saca nos Pais for di e abismo aki!!!