UPP: E resultado di e reunion riba Codigo Civil ta demostra cu e discusion di “partner registra” mester wordo atendi separa

Partido UPP cu hopi atencion a sigui e reunion di Parlamento unda cu a cuminsa trata e cambionan den nos Codigo Civil, cu manera nos tin comprendi, tin masha hopi cambio mes. Loke UPP a premira, ta sosodiendo e momento cu e reunion a cuminsa. Esta, cu e amienda proponi di “partner registra” dor di sra. de Souza-Croes a bin ta tuma mas atencion cu loke ta e cambionan di Codigo Civil, cu manera ta wordo bisa ta un trabou cu a tuma luga pa 5 aña caba.
Den un di nos comunicadonan anterior, nos a pidi Parlamento pa no trata e amienda di sra. de Souza-Croes, mirando cu ta trata un cambio cu durante e 5 añanan di preparacion no a wordo atendi, y diripente ta presenta esaki, sin e debido discusion riba dje. Nos a trata di mustra tambe cu banda di ta un discusion fundamental, tin otro aspectonan cu mester bay tene cuenta cun’e y cu na momento di cambio lo ta bon pa esakinan tambe a wordo studia y eventualmente incorpora den e toma di decision pa asina evita cu otro derechonan tambe ta wordo afecta. Asina UPP a trece e fenomeno di “schijnhuwelijk” cu awor por wordo amplia cu “schijnregistratie” di cua banda cu ta. Na momento cu Parlamento tin pensa di pasa un cambio asina, UPP ta spera tambe cu a tene cuenta cu e toolnan pa bringa tanto e fenomeno di “schijnregistratie” y tambe esun di “schijnhuwelijk”.

Topico pisa mester di tin su espacio pa discusion
Fuera di esey UPP ta kere cu e topico di “partner registra” merece di tin un tratamento separa. No solamente door cu e topico aki lo desvia atencion riba e otro cambionan di nos Codigo Civil, cu tambe lo bay tin impacto riba nos bida, sino pasobra e topico di “partner registra” merece di tin e atencion debido y serio, manera a sosode tur parti di mundo.
Tambe UPP ta kere cu tanto pa e cambionan di e Codigo Civil, tambe como e topico di “partner registra”, ambos proceso, mirando e importancia, no tabata tin un proceso di informacion necesario y responsabel na nos comunidad. Parlamento, pero mas ainda gobierno a faya barbaramente den esaki.
Den e proceso di “Bon Gobernacion” cu UPP a presenta na 2013 durante eleccion, y tambe e varios intentonan pa convence partidonan politico aki na Aruba, pa bin cu “compromiso nacional”, tin diferente facetanan di participacion di tur e gremionan di nos comunidad den toma di decisionnan importante y cu por culmina, si pueblo ta hiba e deseo aki, den un referendum. Esaki no ta kita nada di “bevoegdheid” di un Parlamentario, particularmente si e eleccion cu a tuma lugar cierto topiconan no tabata puntonan cu un partido a presenta na e electorado Arubiano.

Antagonismo cu ta hiba e pueblo aki na mas division
Loke UPP a tuma nota di dje tambe ta e antagonismo, incluso di e propio Parlamentario de Sousa-Croes, na momento, cu su derecho, a purba di hustifica y splica su punto di bista y su conviccion. Nos por mira riba social media tambe e reaccion, di un banda pa otro, cu nos di UPP ta kere lo no contribui na e harmonia cu Aruba mester. Un harmonia cu ya for di hopi aña caba aki na Aruba no tey mas. UPP ta kere den un discusion serio y habri riba e topico aki, cu e intencion di por informa debidamente e comunidad di e escoho cu tin aki, y pa na final e comunidad por carga escogencia cu lo mester tuma luga.
UPP kier enfatisa, un biaha mas, cu no ta trata aki di un escogencia sin mas di ta na fabor of en contra. Pero henter e proceso di escoho mester wordo haci den un forma corecto, cu respet pa nos proceso legislativo y cu respet pa henter comunidad. Tur esaki basa riba estudio y investigacion pa asina mira e miho manera pa pareha di mesun sexo of parehanan hetero cu no scohe pa un matrimonio, por oficialisa nan relacion y haya tur e derechonan
rekeri.

AVP ta dividi y liderasgo ta keto manera custumber
UPP por a tuma nota cu no ta solamente e pueblo ta dividi den esaki, pero tambe den e partido mayoritario tin division. Si AVP no tabata dividi, e reunion cu a cuminsa dialuna, lo no mester a bin e proposicion pa suspende esaki. Pa camufla e division aki, partido AVP ta purba di tira culpa riba partidonan den oposicion, incluyendo UPP. Den hopi asunto oposicion tabata tin otro opinion, pero no a core suspende e reunion. Pregunta ta, di con awor si a hasi di haci esaki?
Aparentemente partido AVP tampoco no ta cla pa esaki, sigur mirando cu awor numa, despues di mas di 5 aña di preparacion di ley y despues cu 2 luna e discusion aki di “partner registra” tin pueblo asina dividi, gobierno, pa medio di e dos ministronan cu a presenta den Parlamento dialuna, no por contesta ningun pregunta y mester bay Conseho di Minister bek. E persona, cu mester lidera henter e proceso di cambio di nos Codigo Civil, mes a briya cu su ausencia, esta Prome Minister Mike Eman. Parlamento a faya aki tambe, dor di no a exigi presencia di Prome Minister.
Pesey UPP ta kere cu si a scohe pa e ruta di dialogo, awe nos no ta na unda nos ta awe. Hustamente un partido cu ta sinta pronkia cu su supuesto “Dialogo Social”, cu nan kier purba di laga pueblo kere cu ta nan a inventa esaki.
Como partido Social Democrata UPP kier enfatisa cu nos ta contra tur tipo di descriminacion y sigur contra di esnan cu tin un diferente escoho of orientacion sexual. UPP ta respeta e forma di biba aki cu ta wordo escohi pe. Pero alabes UPP ta kere cu e procesonan aki tambe mester tin su trayectoria na unda un comunidad tin cu haya informacion y concientisa su mes riba cambionan fundamental cu kier wordo introduci.

Comments

comments