Diabierna 31 di Maart un biaha mas un otro atraco a tuma luga. Awo a toca turno y e mala suerte na e oficina di Gobierno na Savaneta. Apesar cu e malhechornan a wordo gara, e.o. danki na studiantenan di scol pa polis, nos por bisa cu e cantidad di atraconan a bira asina hopi, cu ya casi atraco a bira algo normal aki na Aruba. E pregunta ta cu si nos mester sigui acepta esaki.
Constantemente nos por scucha cu ta pa falta di e minister concerni, kende no ta pone atencion of no ta worry kico ta sosode. Tanten cu e minister aki ta bisa cu ta un percepcion ta biba den pueblo y cu ta mayor, maestronan ta lantando nan yiunan na un forma no corecto y cu ta e situacion na Venezuela ta causa di esaki, nos no por spera ningun solucion. Pero UPP ta kere, cu rond di e minister mester tin hende cu ta suppose di por conseh’e kico pa haci pa preveni atraco.
UPP un paar di siman pasa ya caba a cuminsa elabora riba aspectonan di siguridad aki na Aruba. Nos a toca e rol cu companianan di siguridad priva ta hunga den combatimento di criminalidad y/o siguridad aki na Aruba. Mescos uso di tecnologia moderno den esaki. Nos a bisa cu entre otro mester bin cursonan di entrenamento pa esnan cu ta traha den dicho companianan, unda cu lo otorga certificado na tanto trahado como e compania di siguridad y mehoracion di salario, creando asina un tipo di sueldo minimo pa e categoria aki.
A base di cursonan aki, e miembronan di siguridad lo ta entrena y prepara pa di antemano sa kico pa haci, pa evita cu atraco por wordo cometi facilmente, manera ta sosode aki na Aruba na e momentonan aki. UPP kier tuma e atraco di diabierna como un ehempel, pa mustra con lo por a evita cu un atraco asina a sosode.
Diabierna nos a compronde tabata dia di pago di pensioen na nos grandinan. Consecuentemente tur hende, incluso e atracadonan, sa cu lo tin hopi placa den e edificio. No mester lubida cu tur luna ta paga riba mesun fecha y na mesun sitio, y e atracadonan sa esey. Cambia e luga y fecha cada bes por ta un manera pa preveni, pero esaki lo ta dificil. Pesey ta indespensabel pa pone extra personal.
E prome pregunta ta, a percura pa mas hende di siguridad na e sitio? Nos informacion ta, cu for di cuminsamento di aña caba no tin personal di CEA eynan, pero un persona cu ta empleado di un compania di siguridad priva. Esaki naturalmente sin nada pa proteha su mes. Aki caba por a preveni cu si dia cu tin hopi mas placa, ta pone extra vigilancia. P.e. vigilancia pafo di e edificio cu por vigila movecionnan pafo, y cu por avisa esun cu ta paden ora esaki ta necesario.
Aki ya caba nos por mira e importancia di e cursonan cu UPP ta papia di dje. Si tin hendenan den servicio di e companianan aki cu a sigui e cursonan aki, nan lo bisa nan superiornan, cu extra personal ta necesario pasobra lo tin mas placa den e edificio e dia ey. Esaki no ta conta pa oficina di gobierno so, pero pa banconan tambe.
Pronto lo bay habri e MFA na Savaneta y ta di spera cu eynan lo no bay cremencha riba e aspecto di siguridad. Esnan cu ta traha den e edificio aki, mester por bay nan trabou sin miedo pasobra nan sa cu Gobierno ta percura cu tin suficiente hende pa protehanan. Ya cu ainda e edificio no cla, ta di spera cu lo bin un asina yama “draaideur” na unda solamente un persona por sali cada bes. Un porta asina ta yuda preveni cu atracadornan por “escape” facil. Mester exigi di tur banconan pa tin e tipo di portanan asina.
Aparte di esaki, manera UPP a bisa caba, mester bin un cooperacion estrecho entre tur esnan cu ta traha riba e tereno di siguridad tanto den sector publico como priva.
Mester un plan integral con pa proteha edificionan, proteha e pueblo y e personal laborando den sector aki. No tin luga pa sectornan traha separadamente for di otro. Si nos no haci esaki, anto cada bes nos lo keda core “achter de feiten aan”. Ta pesey UPP a scoge e ruta di trece posibel solucionnan pa e situacion di e siguridad aki nan Aruba.
Ta di elogia cu apesar cu Gobierno no ta furni nos cuerpo policial cu e fondo cu ta necesario pa combati criminalidad manera mester ta, nos cuerpo policial a sa di gara e atracado den un tempo record. Esaki no mester kiermeen cu nos ta bay sinta keto riba e situacion di siguridad aki na Aruba.
E realidad ta cu nos mester bay traha riba prevencion. E atraco aki a laga un herido atras, empleadonan den trauma y empleadonan hopi spanta. Realidad ta cu tur esaki por a ser evita si medidanan adecuado a tuma luga y si Gobierno no a bay cremencha riba e gastonan di seguridad. UPP ta spera cu tanto e minister di Husticia, minister di Asuntonan General responsabel pa e edificio y oficina y minister di Finansas pa e parti di placa, tuma accion rapido y efectivo pa no lamenta lo peor.