Sra Ray Ann Hernandes, directora di Fondo Cultural di Aruba, UNOCA, a expresa cu desde 1986 cu UNOCA a wordo lanta, el a co financia diferente bukinan di diferente autornan local. Esaki ta wordo haci pa promove obranan literario na papiamento.
UNOCA tin mas cu 30 añanan di existencia y cu ayudo di gobiernonan di Aruba nan logra di lanta un magazijn di bukinan hopi grandi cu a wordo produci durante e ultimo añanan.
Ta considera hopi importante pa pusha e bukinan aki pa sali na benta riba mercado, pa nan por yega na man di hende pa wordo lesa. Na October ultimo, UNOCA a lansa un campaña unda nan tabata tin 50% di descuenta ariba bukinan. Despues di esaki nan a bay over na un proyecto hopi bunita di entrega un pakete di buki na e scolnan.
Siman pasa, scolnan basico a ricibi un pakete di 205 bukinan mas algun cd cu dvdnan cu tin informacion cultural y educativo. Nan a logra entrega casi tur scol, pero nan a haci entrega oficial na tur e scolnan di Aruba, unda cu nan por busca un pakete di buki. Cada pakete lo tin un un balor total di 3 mil florin.
Sra. Ray Ann Hernandes a expresa cu esaki e lo ta un proyecto hopi bonita, scolnan por engrandece nan biblioteca y promove nos idioma. Esakinan ta bukinan na papiamento. Banda di cu esaki ta importante pa promove nos idioma, e ta bay tin su efecto den loke ta e hecho cu aworakinan, gobierno di Aruba tin plan pa implementa scolnan multilingual, caminda cu papiamento ta bay bira e idioma di instruccion. Pa ora cu esaki keda concretisa, ya tin tur e material di bukinan aki disponibel pa e muchanan por siña y lesa papiamento na scolnan tambe.
Den e edicion aki, e benta di e bukinan a pega un rato, esaki lo por sosode pa diferente motibo. Tin biaha nan lo print na cantidad mucho grandi, otro parti ta tambe cu UNOCA nunca a tuma e rol cu nan ta promove of yuda na e benta, djis e mesun autor tin e responsabilidad y e tarea di sali promociona nan mesun buki. Tin biaha no ta sosode, pero en berdad libreria semper lo keda pidi bukinan y esey kier men cu e bukinan ta move y nan ta bendiendo bon. Pero si tin biaha e benta a pega algun periodo largo, pa mas cu 5 aña, e ora UNOCA lo pusha pa nan wordo bendi.
E funcion principal di UNOCA lo ta pa sirbi como fondo pa e autornan lo sigui skirbi na papiamento, y tur lo cual cu cay bou di arte, obranan di literatura, teatro, y si lo tin autor cu nan obra cla nan lo ta invita pa pasa libremente na sede di UNOCA yena formulario y haci nan solicitud pa financiamiento di su obra.
UNOCA tambe ta ofrece bukinan na hulandes of ingles depende di e genero, e literatura pa mucha e ta hopi solicita, tambe buki di informacion cultural of historico,
preferiblemente den e caso aki nan ta financia historia local, focus riba Aruba. Tin hopi hende capacita cu ta realiza investigacion na nivel profesional, pero lo cual UNOCA kier ta pa keda pusha e idioma papiamento a trabes di e bukinan, tin corector na papiamento na Aruba, esaki lo ta pa yuda e autornan cu lo por tin algun duda cu e idioma e ora e corector lo yuda pa edita nan buki den corecto papiamento, tambe tin e buki blauw di papiamento cu tur e palabranan, segun Sra. Ray Ann Hernandez, directora di UNOCA.