Diahuebs ultimo dia 24 di Januari 2018, UNOCA, Union pa Organisacion Cultural Arubano, a haci un donacion di buki na tur scol basico na Aruba. Cada scol a ricibi un pakete di 205 buki, mas algun CD y DVD educativo of cultural. E bukinan ta di diferente titulo, tanto na Ingles, Hulandes y mayoria na Papiamento. Tur e bukinan ta di autornan local y ta varia di bukinan di storia (fantasia), bukinan di historia y bukinan cu informacion cultural. E intencion di esaki ta pa e muchanan di e scolnan basico haya mas material local pa lesa, den nos mesun idioma.
Durante e presentacion di e paketenan aki na e scolnan, a hiba palabra, Ministro di Finansas, Asuntonan Economico y Cultura, Sra. mr. Xiomara Ruiz-Maduro, kende a expresa cu e ta hopi contento cu e gesto aki di parti di UNOCA, mirando cu esaki ta pone enfasis riba Papiamento, cu segun e mandatario ta hopi bunita y importante pa nos muchanan. Ademas, e la subraya e importancia pa mayornan y educadornan inculca e amor pa lesamento y Papiamento cu ta forma parti di nos cultura, den nos muchanan. E mandatario a pidi e cabesantenan presente pa haci un extra esfuerso durante e aña aki cu ta aña di Papiamento, pa pone atencion na nos idioma. El a finalisa gradiciendo UNOCA pa e bunita gesto aki pa nos muchanan y pidiendo pa nos ban lanta nos muchanan cu amor pa Papiamento.
Tambe a hiba palabra, Ministro di Enseñanza, Ciencia y Desaroyo Sostenibel, Sr. dr. Armand “Rudy” Lampe, cu tambe a gradici UNOCA pa e donacion aki na e scolnan y tambe e autornan pa a produci e obranan literario aki. Den su discurso, e mandatario a expresa cu e ta sinti cu universo ta conspirando positivamente na fabor di Papiamento. Ministro Lampe a elabora riba e hecho cu e iniciativa aki di UNOCA ta pas den loke Aruba ta trahando riba dje, implementando e programa multilingual den e scolnan na Aruba, caminda cu Papiamento ta bay bira idioma di instruccion na e scolnan y tambe e hecho cu e aña aki a wordo decreta aña di Papiamento. Segun e mandatario tur esakinan ta mustra cu Papiamento ta den un desaroyo positivo. E mensahe di e Ministro ta pa nos aprecia nos idioma mas ainda pa e no disparce. E tambe a finalisa gradiciendo UNOCA un biaha mas pa pone e materialnan aki disponibel pa nos muchanan y nos docentenan.
E cabesantenan presente a expresa nan gratitud na UNOCA pa e gran regalo aki cu nan a ricibi pa nan scol of e biblioteca di nan scol. UNOCA ta contento di por aporta na un manera positivo na e scolnan basico di Aruba. Nos ta spera cu mas autornan local skirbi mas buki na Papiamento pa asina nos sigui enrikece nos herencia literario. UNOCA ta hopi orguyoso di por a contribui na e mundo literario pa mas di 30 aña, sigur mirando cu mayoria di e obranan cu UNOCA a cofinancia ta na Papiamento y asina nos ta aporta na sostene y eleva nos mesun idioma.