Universidad di Aruba ta publica Relato Anual 2020

Universidad de Aruba tin e placer pa haci entrega di su Relato Annual 2020 na minister encarga cu Educacion, Dr. Armando Lampe.

E entrega a tuma luga dia 27 di mei. Presidente di e Hunta di Supervision di e instituto, drs. Herry Koolman a reconoce y gradici personal di Universidad pa nan profesionalismo y dedicacion pa completa e trabaonan pa cu e relato anual, incluso e control y certificacion di accountant, na forma diligente pa asina e instituto por a hasi entrega di esaki manera ley ta prescribi.

E relato anual di Universidad di Aruba  ta inclui un descripcion desaroyonan general, logro y eventonan mas importante di e aña cu a transcuri. E relato tambe ta inclui informacion di e resultado di investigacion, publicacionnan di e instituto, estado financiero y e reporte di un accountant independiente.

Aña 2020 tabata un aña mundialmente extraordinario y a presenta desafionan specifico pa Aruba y institucionnan di enseñansa. E tabata un aña cu innovacion y digitalisacion acelera. Pa medio di esaki, Universidad ta invita lectornan pa bishita su website pa lesa mas di e desaroyonan aki. Universidad di Aruba ta reconoce y ta duna contenido na e importancia pa publica su relato financiero, pa promove transparencia y alineacion cu e principionan di bon gobernacion na Aruba y pa sigui genera confianza den nos institucionnan publico y semi-publico. E relato annual 2020 ta disponibel riba e website di Universidad di Aruba: http://www.ua.aw/annual-reports.

Comments

comments