E vision di Sr. Marin Bijl cu a bira un realidad. Bou auspicio y guia di staf y personal di Divi & Tamarijn All Inclusive Food & Beverage department, EPI Horeca y Universidad di Aruba, Facultad di Hospitalidad y Turismo (FHTMS) ta presenta pa di dos aña consecutivo e fundraising dinner cu tema: “Eat to Educate: Aruba’s Global Culinary Experience” cu lo tuma luga dia 13 di oktober den e hardin espectacular di Universidad di Aruba. E studiantenan ta preparando un anochi pa 200 persona, cu ta inclui diferene stacion di cumindanan di rond di mundo, entre otro platonan Arubiano, Hulandes, Asiatico, Italiano y Mediterreano. Lo tin biñanan di e region corespondiente y ademas un mixologist lo ta presente pa prepara bebidanan mas sofistica durante e anochi.
E metanan di e evento ta multiple, na prome luga ta ofrece na e studiantenan un atmosfera educativo bibo, caminda cu nan lo organiza e evento di comienso te final, lo prepara e menu, hasi e mercadeo, cushina e cena, setup, sirbi y break down, preparando nan mihor aun pa nan carera den e industria. Na di dos lugar e ta un evento pa recauda fondo pa facilita field trips y actividadnan culinario pa studiantenan di ambos facultad pa sigui hasi posibel e concepto di “experiential learning.” Den e industria global tin varios ehempel di e tipo di proyectonan aki p.e. South Beach Food & Wine Festival organisa pa Florida International University (FIU).
“E prome aña di e evento tawata uno exitoso cu nos a siña hopi di dje y e aña aki manera projecta a habri porta pa mas colaboracion entre partnernan den e industria. A largo plaso tiponan di eventonan asina ta mantene bibo e colaboracion entre parternan y institutonan educativo manera EPI y UA cu ta beneficia tur stakeholder involvi, primordialmente e studiantenan. Nos ta gradici Sr. Marin Bijl, GM di Divi & Tamarijn pa su vision y e esfuerzo incansabel di su staf y personal pa hasi e evento aki uno unico y exitoso. Mas cu claro tambe kier a gradici tur nos sponsor nan cu ta hasi e anochi aki posibel entre otro: Eventions, Angelo Koolman, Sharp Productions, Sunny Ray Aruba, Arion Wine, Tropical Bottling, Divio Pepia Est, Gianni’s Group, La Cava, Vibrations PR, Romar Trading y Aruba Trading.” Decano John Wardlaw ta elabora.
Na nomber di studiantenan y staf di EPI Horeca y UA FHTMS ta invita e comunidad di Aruba pa un experiencia unico den un atmosfera diferente, combina cu platonan di mundo henter, cu biñanan di diferente region y conversacion ameno – comiendo pa educa. E evento lo ta dia 13 di oktober, 2018 di 7:00 – 10:30pm na Universidad di Aruba. Lo tin un welcome cocktail, hors d’oeuvres y entretenimiento musical den man di Angelo Koolman featuring Bamboo Band. Ticketnan ta disponibel pa $150 pa pareha y $75 pa persona. Companianan cu kier gradici nan staff, mihor empleadonan, y/of clientenan y regala nan esaki por tuma contacto cu Decano John Wardlaw na [email protected], [email protected] (+297 526-2240) of Sra. Jo-Anne Croes na [email protected] of whatsapp (+297 592-1274).