Durante e College Fair ariba 2 y 3 di november, Universidad di Aruba lo ta presenta pa duna informacion ariba e bachelor programa nobo (BASc.) cu lo ofrece 3 specialisacion: Bio-environmental studies, Informatics y Technology & Engineering. E programa full-time aki cu un duracion di 3 aña lo wordo ofrece na Ingles y ta enfoca ariba desaroyo sostenible den island states. E programa ta wordo desaroya conhuntamente cu Katholieke Universiteit Leuven, un universidad Europeo renombra cu excperiencia extensivo ariba e area nan aki.
Studiante nan cu lo completa e programa aki, lo por drenta e mercado laboral den un variedad grandi di functio nan tecnico den e industria, sector publico, laboratorio nan pero tambe instituto nan di desaroyo y organisacion nan di medio ambiente. Danki na e karakter amplio di e programa, e graduado nan lo tin un background cu lo permiti nan pa adapta nan mes na e mercado laboral cu continuamente ta cambia den futuro. E profiel di e graduado nan lo determina tambe si nan lo ta adecua pa funcion nan mas specialisa.
Pa mas informacion tocante e programa aki, rekisito pa admision y di e specialisacion nan nos ta invita tur hende pa pasa na e booth di Universidad di Aruba na e College Fair of via email: [email protected].