Universidad di Aruba ta conoce shete graduado nobo di Docente di Matematica

Dia 20 di Juli 2021, 7 graduado a ricibi nan diploma ‘tweedegraads’ di docente di Matematica na e facultad di Arte y Ciencia (Faculty of Arts and Science (FAS)) na Universidad di Aruba (UA). E 7 graduadonan ta: Jonathan Bocanegra, Mary-Ann Pereira, Shabala Cabral de Andrada, Nayenza Boezem, Leandra Dijkhoff, Gianina Medina y Nardini Solognier. E programa, cu a cuminsa na 2013, tin actualmente 32 graduado.

E dean di FAS, dr. Mieke de Droog a cuminsa e anochi cu un palabra di bon bini na tur e graduadonan, famianan di e graduadonan y docentenan.

Despues cu Sra. de Droog a yama bon bini na e graduadonan, Mary-Ann Pereira y Leandra Dijkhoff a presenta un video di nan portofolio cu tabata parti di nan ultimo tarea. Fuera di esaki, nan a presenta un reflexion cortico di kico tur nan a siña di e opleiding, unda nan lo bay traha proximamente y kico nan ta haya importante como docente di Matematica na Aruba. Despues di esaki Tim Croes, ex dean di FAS y ex director di e programa di Matematica, a duna un palabra di felicitacion na cada un graduado. Por ultimo e rector nobo di Universidad di Aruba, dr. Viola Heutger a duna palabra di felicitacion y haci e entrega di e diploma na cada un di e graduadonan.

Universidad di Aruba ta orguyoso di e graduadonan cu a logra surpasa tur obstaculo y asina logra termina nan estudio durante e pandemia di COVID-19. UA kier a gradici tur e docentenan cu a duna tur di nan banda y haci un esfuerso grandi pa a yuda e graduadonan durante e temporada aki pa nan por a caba na estudio.

Pronto e graduadonan lo duna les di Matematica na diferente scol na Aruba. Ademas, Universidad di Aruba ta sumamente contento cu Jonathan Bocanega cu lo sigui cu su masters online banda di su trabou como docente di Matematica. UA ta desea Jonathan y tur otro graduado tur clase di exito y cu mas graduado por sigui e ehempel di Jonathan.

 

Comments

comments