Recientemente dean John Wardlaw y Sra. Jo-Anne Croes, docentenan di Universidad di Aruba, Facultad di Hospitalidad y Turismo (FHTMS) a presenta na e prestigioso conferencia EuroCHRIE2018 cu a tuma lugar na Dublin, Ireland. EuroCHRIE ta e federacion oficial pa Europa, paisnan Meditereano y Africa formando parti di International CHRIE (Council on Hotel, Restaurant & Intsitutional Education). Esaki ta e organisacion international liderando y aportando na educacion y training pa un di e industrianan mas grandi di mundo, esta hospitalidad y turismo.
EuroCHRIE ta ofrece un plataforma ideal pa comparti informacion atraves di conferencianan, publicacion nan y coneccion (networking) individual. E forsa di e organisacion ta enfoca ariba comparti y intercambia ideanan, visionan, experiencianan, materialnan educativo, estudionan y technologia den e industria. E conferencia ta trese educadornan di universidadnan y partnernan di e industria hunto, percurando asina pa combina esfuerzonan formando e futuro di hospitalidad y turismo riba un nivel global.
E publicacion academico titula: “Attitudes and behaviors: Aruba timeshare visitors’ satisfaction and behavior intention” ta un estudio realisa den colaboracion cu Universidad di South Carolina (USC), Dr. Robin DiPietro, Dan Jin, y di Universidad di Aruba (UA), Jo-Anne Croes y Dean John Wardlaw. E data cu a usa ta di studiantenan di FHTMS cu a colecta durante e semester na 2017 como parti di e curso di Timeshare Management pa amplia nan conocemento riba e tereno aki.
E industria di Timeshare durante e ultimo 40 añanan ta uno importante den e historia y desaroyo di turismo na Aruba. E estudio a investiga e actitud y percepcion di bishitantenan di timeshare na Aruba, pero tambe nan experiencia y evaluacion nan relaciona cu e industria en general. Asina por purba compronde ki factornan lo yuda completa e circulo di percepcion cu lo induci mas satisfaccion y con e satisfaccion aki lo conduci na mas actividad commercial di parti di e bishitantenan di timeshare. Ademas tambe a investiga si e experiencia di Timeshare ta cambia basa ariba e caracteristica di p.e. entrada anual, sexo of edad.
Resultadonan di e estudio ta demostra cu mayoria di e bishitantenan cu a participa ta entre 61-65 aña (17.2%), y mas cu 90% tin mas cu 41 aña di edad. E tres factornan cu a afecta satisfaccion en general ta: 1) calidad di beachnan, 2) Clima y tempo y 3) Amabilidad di e hendenan. Factornan cu a afecta satisfaccion cu timeshare ta: 1) Calidad di acomodacion, 2) Balor pa nan placa (Value for money) y 3) Amabilidad di e hendenan. Esaki ta afecta partialmente e aspecto comercial pa lo siguiente: 1) Recreacion, 2) Actividadnan Cultural y 3) Spa/Massage. Ademas e estudio a divulga cu percepcionan y experiencianan di timeshare ta diferencia entre esnan mas jong y esnan di mas edad. Ta spera cu e generacion si Millennials lo crece mas cu Boomers den e industria di Timeshare.
“E conferencia aki tawata un experiencia sumamente interesante, pa comparti y conecta ariba diferente topiconan cu educadornan bibando den e mundo di educacion di hospitalidad y turismo, mescos cu nos facultad, trahando cu e meta pa combina e mihor di ambos mundo, esta educacion y e industria mes. Ademas a regresa cu ideanan nobo pa estudionan y conocimiento adicional di educacion y progrmanan di hospitalidad y turismo.” Decano John Wardlaw ta subraya.
Pa informashon tocante e programa di FHTMS por bishita www.ua.aw of www.facebook.com/UA.FHTMS. E Facultad di Hospitality and Tourism Management Studies di Universidad di Aruba ta reconoce e contribucion unico y strategico di e industria di turismo pa e desaroyo di Aruba y Caribe. E studiantenan ta wordo prepara ariba terenonan pa un carera profeshonal den diferente ramo.
