STOCKHOLM, Suecia- E futbolistanan di Manchester United a dedica nan titulo di e Liga Europa na e victimanan di un atentado di un atacante suicida e siman aki, cu a laga 22 persona morto y decena di heridonan.
Prome cu e partido, a tene un minuut di silencio pa e fayecidonan den e atake despues di un concierto di e strea di pop Mericano, Ariana Grande, cu a comberti den un aplauso emocionante di miles di personanan presente den stadion y e grito “Boso lo no muri nunca”, di e fanaticonan di United.
“E atentado tabata un golpi duro”, e arkero Argentino Sergio Romero a bisa na e cadena Fox Sports..
E Frances Paul Pogba a habri e marcado na di 18 minuut cu un remate for di afo cu a desvia den un rival y e delantero Armenio Henrikh Mkhitaryan a pone e score na 2-0, na di 48 minuut.
“Mi kier dedica e trofeo na e victimanan”, e centro campista Spaña Ander Herrera, a bisa. “Esaki ta solamente futbol, pero loke a pasa dialuna tabata algo horibel. Nos kier pas y respet na mundo. Esaki a pasa na Manchester, pero tur caminda nos mester uni pa pas”.
“Diamars nos tabata total loss. Tabata hopi duro pa nos a bay train, pero nos director tecnico a bisa nos cu e unico cu nos por haci ta gana pa nan”, el a agrega.
Hungadonan di Manchester ta dedica e titulo aki, cu tin un nificacion special, na e ciudad di Manchester, cu ta pasando den dianan dificil.
Poco mas di 48 ora despues di e atake, Wayne Rooney a tuma e cinta di capitan y a lanta e trofeo den e mesun stadion unda cu e cantante Ariana Grande a cuminsa su gira mundial di 8 di mei. “Obviamente futbol lo no trece esunnan cu a muri, bek, pero pa nos ta importante di duna e ciudad algo di alegria”, e delantero di 31 aña a bisa. “Nos no ta pasando momentonan facil, no solamente na Manchester, pero full Inglatera”.