Sr. Gregory Fung a Fat di United Farmers Aruba ta splica tocante nan meta pa yuda crece agricultura na Aruba.
E idea a bin ora cu a wak cu no tin organisacion pa acudi na dj’e ora tin preguntanan. A cuminsa papia cu otro cunukeronan pa wak con por yega na algo pa beneficia esunnan cu ta chikito. Januari ultimo, tabatin un workshop di IDEA cu a tuma lugar. A sinta na mesa y papia pa lunanan, pero nada no tabata wordo haci. A sugeri e ora pa cuminsa cu algo chikito y a cuminsa e ora cu un asociacion. Awor ta buscando pa haya miembro. Cada persona tin un angulo diferente con pa trata e problemanan cu agricultura tin y por aporta na esaki.
Segun sr. Fung a Fat, e meta principal ta pa tin un aanspreekpunt pa Gobierno. Un asociacion semper tin mas influencia ora di papia cu Santa Rosa of cu un Minister unda e puntonan ta bira mas agresivo. E asociacion ta activo riba Facebook y diadomingo awor nan lo ta na Bario Fest na Centro di Bario Savaneta. Tambe nan ta pidi donacion p’asina por crea un fondo y realisa diferente metanan di acuerdo nan vision y asina pueblo por conoce loke nan ta purba haci. Nan tin un vision di uni tur e cunukeronan y asina wak con por traha hunto.