United Dog Aruba mester a cuminsa core rond di San Nicolaas pa marca unda tin hopi cachonan di caya pa asina por a bin cu e accion aki pa San Nicolaas por a haya sa atencion e siman aki pa bay na e fase di sterilisa cacho y pushi segun Sra. Mercedes de Bruyn.
Sra. Bruyn a splica cu actualmente nan ta bezig ta recoge e cachonan for di riba caya, pa wordo sterilisa y pa despues pone nan bek ariba caya for di unda nan ta bin. Cada cacho tefi ta haya un average di 64 mil cacho den un tempo di 6 aña y ta purba di pa tin menos cacho posibel ariba caya. Eigenlijk tur loke ta cana ariba caya, ta wordo hiba pa wordo sterilisa y castra y asina ta yuda e pushinan tambe cu ta biba ariba caya. Tin mas pushi cu tin cacho ariba caya na Aruba.
Na Aruba bo ta haya cu e cachonan di caya ta wordo alimenta door di e bisiñanan door cu nan ta haya duele di e cachonan. E personanan ey ta wordo acerca door di United Dogs Aruba, y kico ta e procedura. Aunke e personanan aki no ta doño, toch nan ta custumbra cu e cacho.
Actualmente tin e malesa di cacho, distempel, cu ta den aire, y si un bario tin e malesa den e aire, e lo keda pasa di un cacho pa otro. Cachonan cu tin distempel nan ta ponenan drumi y lastimamente no tin cura pa e malesa distempel. Un total di 4 cacho ta loke United Dogs Aruba a pone drumi, esaki den cooperacion cu e veterinarionan involucra den e accion aki.
Un cacho cu tin distempel, ta saca vocht for di nan wowo y nan nanishi, nan lana ta cay. E ta un condicion hopi malo y deplorabel pa e propio cacho. E fundacion a tene un sorto di back up pa tin un idea di cuanto cacho nan a sterilisa, esaki cu ayudo di varios boluntario. E ta hopi trabao, segun Sra. de Bruyn, e mester wordo haci of mainta trempan of anochi ora solo sali sino e cachonan no ta bin. Nan ta bay unda cu tin hopi cacho hunto, nan ta pone cuminda pa nan, y ta pone den e trampanan pa e cacho.
Segun Sra. de Bruyn, e cantidad di cachonan di caya ta hopi grandi y esaki ta lamentabel. Ta hopi jammer cu tin tanto cacho ariba caya, pero toch di otro banda bo ta haya hendenan cu tin stimacion pa cachonan cu ta biba ariba caya y di un of otro manera ta yuda den esaki. For di aña pasa ta wak toch cierto cambionan positivo relaciona cu e cachonan di caya cu tin mas cu ta wordo cuida door di personanan den vecindario.
Despues di dos dia, e cachonan por wordo poni bek ariba caya. Diahuebs di total di 80 bestia, a sterilisa 24 pushi. E prome dia di 70 bestia, a sterilisa 1 pushi. Ta purba haci e cachonan prome, pero e pushinan ta hopi mas facil pa gara. Pushinan ta recupera despues di un rato, segun Sra. Mercedes de Bruyn, di Fundacion United Dog Aruba.