A pesar di contratiemponan cu e caso aki a trece cun’e, directiva di SIMAR por mira atras riba un lucha cu a termina diabierna ultimo na fabor di su miembronan, e Unit Managernan di Colegio EPI.
E acuerdo entre Minister di Enseñansa y SIMAR/ Managernan a ser firma despues cu e concepto traha pa abogadonan Faarup y Figaroa a bay y bin diferente biaha pa adaptacion. E producto final, consistiendo di diferente punto, incluso e peticion principal cu a tranca e negosacionnan, cual tabata pa pone un tercer persona na disposicion pa asisiti e Unitnan cu dos Manager cu tur responsabilidad y derecho pa tuma decision acerca, a cera e negosacion. Ta di lamenta cu Minister di Enseñansa, Director di DPS y Directie di EPI, como superiornan di e Managernan a scoge te na ultimo ainda riba e anochi di e kortgeding, pa purba di difama Managernan siendo nan propio empleadonan cual absolutamente no a yuda pa yega na e solucion.
SIMAR ta di opinion cu e caminda pa yega na culminacion di e caso tabata demasiado largo, specialmente si menciona cu e punto di un tercer persona a ser treci dilanti ya for di dos siman pasa door di SIMAR, sin cu a ricibi reaccion alguno di Minister. Un siman despues, riba e mesun dia cu studiantenan a anuncia manifestacion, SIMAR a ser notifica di e kortgeding cu meta pa manda e Managernan reanuda trabou.
SIMAR, e Managernan, incluso Hues a keda babuca na momento cu Abogado di Minister a bisa den sala durante tratamento di e kortgeding, cu Minister a acepta e proposicion aki y cu e tabata en espera di un lista di docente apunta pa e tarea extra. Esaki mientras cu e mesun mainta Minister a declara den noticieronan di no ta acepta esaki.
Esaki a pone cu mas cu logico Hues no a nenga e derecho di welga y a duna indicacion pa Minister reacciona riba e proposicion di SIMAR y pa partidonan bay bek den negociacion.
Esaki a transforma den e documento cu despues di a haci algun ahustacion chikito a yega na producto final cu diabierna a ser firma pa Managernan y SIMAR. Esaki a nifica na e mesun momento cu Managernan a bay di acuerdo pa reanuda trabou na un 100% desde dialuna. Entre otro a acorda cu nan lo evalua e situacion, dunando prioridad na e formacion di periodo 1 y lo percura pa normalisa y trece trankilidad na e situacion mas pronto cu ta posibel cu bienestar di enseñansa en general na EPI den mente.
Durante trayectoria di tratamento di e caso aki, te na momento di tratamento di e caso den corte, SIMAR a realisa cu hopi actor importante no conoce historia di EPI, no conoce e contenido di EPI y no ta conciente di e contenido di e tarea,di e responsabilidad y di e importancia di presencia di Managernan di EPI pa e funcionamento optimal di e instituto.
Cu esaki SIMAR ta cera un capitulo mas di su historia y ta manda e mensahe na tur docente: Si abo como docente ta traha den un situacion inacceptable y bo ta sinti cu ta trapa bo derechonan, bo tin tur derecho di manifesta, protesta, demostra y welga pa mustra bo malcontento.
Mas cu cla a keda demostra cu UNION TA HACI FORSA.