Frans Ponson, di Comerciante Uni Aruba, den cuadro cu lansamento di nan app nobo pa conecta tur comerciante grandi y chikito hunto ‘Comerciante Uni Aruba’, ta bisa cu hopi biaha tur comerciante den pasado tabata para nan so.
E ta pasa tur caminda, ora cu bo ta bo so, bo bos no ta suficientemente fuerte segun sr.Ponson. “P’esey nos ta bisa, nos mester trece hopi punto dilanti, nos a traha riba diferente punto caba, pero ora bo yega gobierno anto bo tin dos hende bo bos no ta conta den comparacion cu cien hende,” segun sr. Ponson
P’esey mester e multitud di comerciante pa join Comerciantenan Uni pasobra e bos lo tin mas peso. Comerciante ta wak e negoshi, y ultimo tempo por medio di e pandemia, ta hopi situacion y conflicto laboral a lanta riba nos isla.
Hopi comerciante si a trece dilanti cu esaki ta un preocupacion. Ora di trata di retira empleado, na Aruba e ta simpel, mester busca un pakete pa ofrece y no djis yega manda hende cas sin placa. “Pero por ta bo tin cu haci e pa salba un compania pa otro 10 trahado, anto e discusionnan ey tin ora ta poco dificil pa un gobernante of institutonan compronde. Pero un comerciante cu tin su cas riba un borg, e ta perde tur cos, e sa ki decision e mester tuma,” segun sr. Ponson.
E tipo di discusionnan aki mester bin dilanti por ehempel den e app nobo aki pa asina sinta hunto cu Departamento di Labor, mirando cu lo tin mas datos, cifras y mas hende cu lo bini hunto pa acumula informacion, dialoga y resolve problemanan. “Bo haya 200 comerciante duna nan punto di preocupacion, bo por bay por ehempel departamento di Labor y splica nan pa nan tambe compronde, pa nan mira cu tin mas cu 100 hende cu tin un problema cu tal of tal problema, p’esey nos mester hopi hende registra riba e app.”