No ta un secreto cu criminalidad aki na Aruba a bira un di e temanan mas cayente di ultimo tempo. E Arubiano ya no ta sinti su mes sigur mas riba su propio pais pa motibo di e ola di criminalidad cu ta asotando nos pida baranca. Tampoco den su cas, ni na pia di su trabou. Ciudadanonan ta den incertidumbre ya cu hasta den dia cla y den cas cu doño presente, e malechornan ta tribi di ataca. Union Sindical di Aruba, consistiendo di sindicatonan SIWA, FTA, SIMAR, SEPPA, UEA, ALVAST, IOUWA, STT, ABV y SADA ta conciente di e situacion alarmante aki y actualmente tin esaki como un di su puntonan di prioridad pa atende.
E sindicatonan menciona cu a uni desde November di 2015 ta atendiendo e tema criminalidad, entre otro, debidamente. Pa varios reunion a delibera cu otro pa fiha posicion di USA riba e tema criminalidad.
USA a pidi pa un reunion cu Minister di Husticia, esta Sr. Arthur Dowers pa atende e asunto aki y pa bin cu solucion tanto riba termino corto, como riba termino largo.
Cada sindicato afilia na Union Sindical di Aruba tin su miembronan na pecho. USA ta haciendo su maximo esfuerso pa percura pa yega bek na e pas, e trankilidad y e siguridad cu tur Arubiano conoce.