CARACAS, Venezuela- E minister di Interior Venezolano, e presidente di Tribunal Supremo y e numero dos di e gobernante PSUV, Diosdado Cabello, ta figura ariba e lista di cargonan halto na kende Union Europeo lo impone sancion pa e situacion den e pais, segun un fuente diplomatico a indica.
Preoucpa pa e “deterioro” di democracia y e derechonan humano den e pais Suramericano, UE ya caba a adopta na November un serie di medidanan, entre cual, un embargo di arma y di material cu por wordo uza pa “represion interno”.
E Europeonan a dicidi e ora di no impone sancionnan individual contra “ e responsabelnan di violacionnan grave di derechonan humano” y kende nan accionnan a “atenta di algun manera contra di democracia of di estado di derecho di Venezuela”, den espera di e desaroyo di acontecimentonan.
E eleccion di un Asamblea Nacional Constituyente, cu ta rigi como poder absoluto den e pais, tabata e punto final pa e adopcion di sancionnan pa parti di e bloke preocupa pa e cuater lunanan di protesta cu a laga un saldo di 125 persona morto entre April y Juli.
Despues di adopta e embargo riba arma, e Europeonan a dicidi di aplica sancionnan individual, manera Canada y Merca a haci.
Fuente: https://www.infobae.com