Union Europeo a pide eleccionnan nobo y pa esakinan ta liber y husto, mescos cu e hecho pa respeta e Asamblea Nacional, libera tur e presonan politico y cumpli cu e derecho di estado, derechonan humano y e libertadnan fundamental na Venezuela. Union Europeo a bolbe pidi pa organiza eleccionnan presidencial na Venezuela ya cu e no ta reconoce e ultimo eleccion caminda cu Nicolas Maduro a bolbe bira presidente. Esaki paso e eleccionnan aki nan no ta considera nan liber y husto. Dilanti e proceso di huramentacion di Maduro como presidente pa seis aña mas, cual ceremonia lo tuma luga Diahuebs awo na Caracas, e vocero Maja Kocijancic, a recorda cu e Conseho di Union Europeo a laga bon cla su posicion riba e situacion di Venezuela na varios ocasion duanate henter aña pasa. E conseho ta di opinion cu “e eleccionnan presidencial na Venezuela no tabata liber ni creibel”. Pesey e conseho di Union Europeo ta pidi eleccionnan nobo pa nan ta liber y husto mescos cu pa duna respet pa e Asamblea Nacional, pa tur preso politico wordo libera y cumpli cu e derecho di estado, derechonan humano y libertadnan fundamental. Maduro a gana cu un bentaha amplio durante e eleccion di Mey aña pasa, caminda cu di parti di oposicion hopi no a bai vota pasobra nan ta bon na altura cu lo bai tin fraude. Oposicion y parti di e comunidad internacional a señala cu no ta reconoce e periodo nobo di Maduro, pero e gobernante a reitera cu e ta asumi e puesto pa “cumpli cu e boluntad popular”, cual el a declara despues di a gana e eleccionnan.
“Nos ta sigui keda convenci pa haya un solucion politico pacifico y democratico cu ta e unico manera sostenibel pa sali di e crisis cu e pais Venezolano ta pasando aden”, Kocijancic a declara. El a bisa cu e discusionnan den e seno di Union Europeo riba e asunto aki lo sigui mescos cu e contactonan entre e estadonan miembro. Den su ultimo reunion, di dia 10 di December aña pasa, e ministernan comunitario di exterior a sigui pusha pa instala un “grupo di contacto” cu mester consisti di e paisnan comunitario y latino americano pa busca facilita e dialogo den e crisis politico Venezolano.