Diabierna ultimo, durante un conferencia di prensa, DOW a informa di cu nan lo cera Havenstraat pa trabaonan cu mester wordo haci ariba e caminda aki. Pa Arutram, esaki tin como consecuencia cu e tram lo no por pasa eynan pa e siguiente 10 pa 11 dianan. Esaki ta un sorpresa pa directiva di Arutram, pa cual Sr. Pierre Croes, director suplente di Arutram ta splica con nan lo haci cu nan itinerarionan.
Door di esaki Arutram a hay’e ta ahusta nan itinerario pa por logra cumpli cu nan. Ainda no tin un solucion concreto y Arutram ta wardando ariba DOW pa duna e guideline pa kico ta bay sosode. E solucion cu Arutram tin na bista cu nan lo tin di core Schelpstraat bay abao. Pero e problema di e caya aki ta ONE WAY bay ariba, esey kiermen cu e tram no por ni core mes, ya cu ora cu e tram ta bay abao, nan lo topa frontal cu e autonan cu ta bin ariba. Pa esaki Arutram lo mester pa DOW cera e caya aki pa tram por core. Di otro modo, e tram no por core e caya aki.
Den pasado DOW tabata pone hende para na e crusada banda di Aruba Trading, nan tabata cera ora e tram ta bin abao, un otro persona ta avisa cu e tram por bin abao. Y ta keda monitor full e pida di Schelpstraat bin abao. Pero den e caso aki ta 10 pa 11 dia, pero te ainda Sr. Croes no ta na altura di kico lo por ta e solucion.
Di un banda, DOW ta bisa di cu nan a informa Arutram mientras cu di otro banda Arutram ta bisa cu nan no a tende nada di DOW ainda. Pa aworaki Schelpstraat ta e caya cu ta e debilidad di Arutram. Si por habri Havenstraat pa e tram por pasa, e ora lo elimina e stop dilanti di ZARA, ora di lora bay abao lo bay di un solo shot, te na e parada den Rancho.
Por ultimo, Sr. Croes a bisa di cu nan lo sigui informa e comunidad di cualkier cambio cu por bini. Nan lo informa na e medionan di comunicacion como tambe ariba e Facebook page di Arutram.
