DERAA MAHATA, Siria – E Fondo di Nacionnan Uni pa Infancia (Unicef) a condena diaranson e atake di un scol den e ciudad Sirio di Deraa (zuid), unda cu cinco menor, di entre 4 y 16 aña, a muri y otro 15 a resulta herida.
Den un comunicado, e representante di Unicef na Siria, Hanaa Singer, a detaya cu “e patio di e scol a wordo golpia na final di un sesion di deporte den aire liber.”
“E atake aki a tuma luga simannan despues di e aña escolar nobo mey mey di un violencia escala den e pais. Den e pio di e miserianan diario, ta kitando for di muchanan di Siria e derecho di siña y hunga,” el a denuncia.
Singer a recorda cu morto y heridanan na menor ta un realidad cu ta wordo produci cada dia riba teritorio Sirio.
P’esey “Unicef ta reitera su yamamento na tur parti di e conflicto pa nan cumpli cu nan obligacionnan bao di ley humanitario internacional y proteha e menornan na scol.
E Observatorio Sirio di Derechonan Humano y e agencia di noticia oficial SANA, a informa diamars di e fayecimento di seis persona, entre nan cinco menor, pa e impacto di proyectil contra un scol ubica den un districto bao di control di autoridadnan na Deraa.
Ademas, SANA a sigura cu ta trata di “un atake terorista” contra e scol “Zat al Netaquin” den e zona di Deraa Mahata.
Fuente: NTN24