Riba diamars a tuma luga e kick-off di e UNESCO Media Pressure Cooker Marathon na Aruba. Den e proyecto aki periodistanan, academiconan y talentonan hoben ta wordo reta pa haci un quick scan riba e paisahe mediatico na Aruba y asina ey publica un long read mediatico. Riba diamars, dia 22 di November, pa 7’or di anochi, den e Aula di Universidad di Aruba, esaki ta wordo conclui cu un Preview Lecture di e investigador di media, Renske Pin. E sesionnan di Pressure Cooker lo tuma luga dianan 19 pa 21 di Januari, 2017, cu un programa intensivo di tres dia cu sesionnan di trabao, transmisionnan en bibo y entrenamento di lecturanan manera Jeroen Pauw y coleganan Dick Drayer, Favell Maduro y Yvess Cooper di nos hermana isla Corsou, cu lo participa na proyectonan di media di UNESCO. Despues di 4 siman di tempo di productividad lo sigui lansamento di e publicacion online, dia 15 di Februari pa publico.
Periodista y expertonan di media por inscribi na e sesionnan di pressure cooker via e pagina di Facebook www.facebook.com/MDPAruba. E participacion ta gratis. UNESCO lo otorga cuater hoben cu ambicionnan periodistico di HAVO, VWO of HBO e posibilidad pa participa. nan mester manda prome cu dia 15 di December nan curriculum vitae y un carta di motivacion (maximo 1 A4) na [email protected] pa asina bin na remarca.
E proyecto aki a ricibi fondo for di e UNESCO Participation Programme y lo wordo ehecuta pa Renske Pin (RE-Quest Research & Consultancy) y Birgit Kreykenbohm (Kreykenbohm Communication). Universidad di Aruba lo sostene e proyecto, e.o. pa ta anfitrion di e eventonan. Studiantenan di Academy of Fine Arts y Design Aruba lo haci un documentario di e proceso.