Hopi ta e kehonan cu ta drenta sea cerca sindicatonan of na departamento di Labor pero hopi biaha e trahador ta sinti cu Departamento di Labor no ta tuma e pasonan pa e trahado. pa cual a acerca abogado mr. Hose Figaroa abogado pa puntr’e te unda un trahado por yega pa haya su derecho.
Pa loke ta trata e rol di Departamento di Labor ariba su mes, aunke nan rol ta mas bien di intermedia, ora tin cierto conflictonan na trabao y tin keho, nan tarea ta di intermedia y yega na un solucion. Pero e departamento aki no tin e autoridad legal pa haci algo pa cu e conflicto mes, nan no tin. Dus si e intermediacion di Departamento di labor, no ta yega niun caminda, esey no ta kita e derecho di e trahado pa busca su derecho den Corte.
Hopi biaha, segun mr. Figaroa, nan ta haya hopi biaha e keho cu e Departamento di Labor ta tuma parti pa e compania. Un biaha mas mr. Figaroa ta enfatiza, cu e departamento aki no tin autoridad den un conflicto. Nan autoridad ta ariba otro nivel. Dus ora cu un compania kier kita un trahado, e ora ey nan mester un permiso pa haci esaki.
Un di e criticanan di FTA, ta e hecho cu tin diferente leynan cu a wordo implementa, dus e ley cu ta regula, na ki momento y con largo por uza un trahado temporario via un uitzendbureau. Tin un tarea eynan pa Departamento di labor pa controla si e ley ta wordo cumpli y e tarea ey no ta wordo cumpli. Y esey si ta un tarea directamente pa Departamento di Labor pa eherce e controlnan. Dus den e caso ey no ta un intermediacion sino ta un autoridad di nan di haci e control y duna sancion cu no ta cumpli cu esey. Y e critica di FTA tabata ariba e parti ey, e tipo di control y sancionnan ey no ta tumando luga. Pero loke ta trata intermediacion mes, nan rol no ta bay mas leu di intermedia y busca un solucion. Pero si esey no hiba na nada, e trahado ta keda cu tur derecho pa busca su rason den Corte.
E articulo general ta bisa cu e dunado di trabao, mester comporta su mes como un bon dunado di trabao. En todo caso trata un trahado malo, no ta di acuerdo cu e articulo ey, mas e autoridad pa coregi esey no ta sinta na Departamento di Labor. E por intermedia y enberdad, hopi biaha sa haya kehonan cu na pensamento di e trahado, e Departamento di Labor no a actua corecto. Pero imporante pa e trahado cu si esey den su pensamento a sosode, e no mester pensa cu no tin otro opcion, pasobra esun cu su tarea ta pa coregi of pa zorg cu ta wordo cumpli cu ley ta Corte aki na Aruba, un hues.
Kisas tin casonan unda cu Departamento di Labor, den opinion di e trahado no ta actua mane mester ta. Opcion di bay na un abogado, semper tey, no mas hopi biaha e abogado ta forma un drempel financiero como cu realidad cu servicio di un abogado no ta e cos di mas barata cu tin aki na Aruba. Dus di e banda ey, hopi biaha ta consehabel pa papia of considera di mira miembro di un sindicato. Y dependiendo di e sindicato, ya cu cada sindicato tin su reglanan pa cu asistencia legal. Pero un sindicato mes por intermedia, a base di ley. Ley ta bisa cu e unico instancia cu por intermedia entre e trahado y e dunado di trabao, pero basta cu e sindicato por demostra cu e tin mayoria representacion den e empresa, segun abogado mr. Hose Figaroa.