Pa presidente di Parlamento e tema aki ta keda un preocupacion den pueblo y aki por wak cu parlamento a cumpli cu ley pero e dunamento di castigo ta keda den man di husticia segun Sra. Mervin Wyatt- Ras.
Presidente di Parlamento a splica cu el a keda contento con e procedura a bay, caminda cu Sr. Maduro a pidi un afspraak y a bin na un manera netjes, y asina combersa riba e tema di abuso di mucha y tur su consecuencianan cun’e.
Locual cu Sra. Wyatt- Ras a splica Sr. Maduro ta cu Parlamento ta bezig cu e ley aki. Na varios ocasion, na aña 2010, a pone diferente instancia hunto y di esaki a sali un rapport, unda cu a manda diferente punto di sugerencia pa gobierno, pa asina traha riba dje pa asina yuda e victimanan di abuso.
Na 2016, atrobe varios persona a cera cabes hunto y a bin Parlamento cu un manifestacion y Parlamento a duna atencion tambe na esaki. Hunto cu e ministernan y asina a repasa e diferente puntonan cu a keda treci dilanti. Un biaha mas ta manda sugerencia pa gobierno , a base di e puntonan pa wak kico a wordo ehecuta y kico no, kico mester sosode ainda.
A reuni cu tres diferente minister, di Asuntonan Social, Salubridad y Husticia, y a saca afo diferente puntonan cu mester traha riba dje. Un di nan ta fortifica Bureau Sostenemi,a entrega un mocion al respecto y ora a cambia e codigo civil a entrega tambe un amienda pa asina fortifica e bureau aki y asina atende cu nan.
Tin kehonan cu ora cu tin casonan asina, nan ta wordo manda di cashi pa muraya. Mester tin un luga caminda ta registra y ta verwijs e diferente instancianan. Tambe e castigonan ainda ta abao. Tabata tin diferente discusionnan den Parlamento, tabata tin ley di iniciativa pa un minimun straf. Sinembargo ta constata cu aunke a cambia ley, Sra. Wyatt – Ras ta bisa cu su persona mes tabata parti di e ley di iniciativa pa hisa e castigonan pa esunnan cu a comete abuso di mucha. E leynan a wordo hisa, a bin mas boet tambe pa sucedidonan.
Na aña 2014 a cambia e codigo penal, pero ora hues duna e castigo, pa e daño grandi cu ta wordo haci na e victima, e castigo ta abao.
Pa Presidente di Parlamento, Sra. Mervin Wyatt- Ras un abuso di mucha ta algo serio pa e victima y e famia pa cual sigur un castigo manera 2 pa 3 aña no ta yuda pa e mensahe yega den comunidad . A ripara e tendencia, ultimo tempo door cu tin mas critica, e castigonan ta hisa un tiki. Sinembargo, ainda e ta abao.
Esaki lo ta un tema cu Parlamento lo sigui trata den e diferente reunionnan. A pidi Sr. Maduro pa follow up, pa asina wak con leu Parlamento ta. Tin hopi cosnan cu mester wordo cambia, un di nan cu ta positivo ta cu e curiculo di sexualidad ta bay scol. Pa hopi aña caba ta papia di abuso di mucha y kibra e taboe, pa ora un mucha pasa den algo asina, pa nan por papia cu un hende.
Conscientisacion ta hopi importante, preveni cu e ta sosode ta hopi importante. Asina Sra. Wyatt- Ras a finalisa bisando.