Diabierna tabatin apertura di Centro di Actividad Rancho pa tur hende bin conoce, e edificio situa den Koningstraat. “Pa nos sigur hopi importante cu nos por a yega na tin un luga cu ta di Fundacion Rancho den e caya aki”, segun Clifford Rosa presidente di Stichting Rancho na apertura di nan Centro di Actividad.
“Esaki ta un soño cu tabata den nos statutonan desde 2010 caba ora cu nos a inicia. Semper a haya cu ta necesario pa e bario di Rancho tin un centro caminda hoben y adultonan por yega na otro y intercambia. Sigur tambe tur e otro cosnan cu tin di haber cu cultura manera conservacion di historia di cultura, pa esaki mester un centro caminda por yega na otro. Aworaki tin e luga riba huur, pero e deseo ta pa pronto recauda suficiente fondo pa adkiri esaki y pa e por bira e prome “asset” di e fundacion.” Esaki segun sr. Rosa ta duna e fundacion forsa pa sigui move pa un miho futuro di Rancho.
E fundacion tey pa diferente artista y otro cosnan cu tin di haber cu cultura y segun e presidente di e fundacion, ta hopi cos tin cu ta haciendo y cu a haci caba y tur e proyectonan aki lo haya un punto central aworaki. Tambe ta inicia cu un tour den Rancho cu ta pone cu no solamente hoben di scolnan of localnan lo tene bishita riba dianan special manera 18 di Maart. Pero un luga caminda tur dia bo por bin bishita y lo tin un tour caminda cu lo mustra cuminda Caribense entre otro. “Como bario nos sa cu nos tin nos culinario, pero tambe cu e ta multi cultural, cual ta e aspecto ‘unico’.”
“Tin espacio pa partnernan den sector priva colabora den e proyecto aki mirando cu ta cerando un acuerdo cu departamento di cultura aworaki. Pues si wak e, semper tabata boga pa tin e sistema di 3 pilar cual ta: pilar publico (Gobierno), Fundacion y tambe sector priva, e tres pilar nan ey mester por traha hunto pa por mira un desaroyo den tur aspecto,” sr. Rosa a termina bisando.