Profesor Ahmad Khundakar, di e Universidad di Teesside (Reino Uni), a splica e corant Britanico Express, den un entrevista publica diasabra ultimo, cu ta dificulta pa guli ta un sintoma specifico di demencia, aunke sa ta poco facil di identifica.
Demencia ta un termino uza pa describi un conhunto di malesa cu ta afecta un of mas funcion celebral, manera memoria, pensamento, lenguahe of comportacion. E Organisacion Mundial di Salud (WHO), ta calcula cu aproximadamente 55 miyon di persona rond mundo ta sufri di demencia. E organisacion ta considera cu e malesa di Alzheimer ta e tipo mas comun di demencia y cu por representa entre 60% y 70% di e casonan.
Dificultad di guli como sintoma di demencia
Di acuerdo cu Khundakar, disfagia, e termino medico cu ta haci referencia n’e dificultad pa guli, ta “un señal inusual di demencia.” N’e mesun momento, a detaya cu e condicion aki ta produci “debi n’e daño n’e regionnan di e celebro responsabel di movemento y coordinacion, incluyendo esunnan cu ta controla e refleho di deglucion.”
“Esunnan cu ta biba cu demencia por experimenta debilidad muscular, problema di coordinacion y reduccion di e sensacion di garganta, loke ta provoca dificultad pa guli,” Khundakar a señala, kende ta bira mas comun, aunke ta varia di persona pa persona.”
E academico a comenta cu e “dificultadnan por inclui cu e persona ta kauw continuamente of mantene e cuminda den boca.” Fuera di esey, el a subraya cu disfagia por causa “perdiad di peso, desnutricion y deshidratacion.”
Segun e Sociedad di Alzheimer, e personanan cu ta presenta problema pa guli por core e riesgo di asfixia of di sufri algun infeccion, den e caso cu e cuminda of e scupi baha door di e slokdarm.
Khundakar a enfatisa cu e individuonan cu mustra sintoma di disfagia mester busca atencion medico di biaha. “E profesionalnan di salud, manera e terapistanan di habla y lenguahe, por evalua e causa subyacente y proporciona intervencion pa mehora e funcion di deglucion,” el a agrega.
Por ultimo, e investigado a sostene cu tanto e “controlnan medico regular” manera e examennan di “deteccion di e deterioro cognitivo” tambe ta fundamental pa detecta di manera oportuno na demencia.
