Den e ultimo siman, Coordinador Nacional Contra Traficacion di Hende y alabes director di Academia di Polis E.J. “Watty” Vos, esta mr. Drs. Jeannette Richardson-Baars hunto cu e C.E.O di Sungate Foundation y director di Salvation Army na Merca, Shamir McKenzie a organisa diferente training riba e topico di traficacion di hende.
Cuminsando nan recorido riba e isla e dos expertonan di traficacion di hende a bishita diferente aerolinea, frontdesk di hotelnan como tambe a combersa cu diferente managernan, “pasobra si por evita cu hendenan ta bin aki y bira victima di traficacion anto e ora ey ta haciendo algo hopi positivo mirando cu ta evita di mester cuminsa caso di investigacion y ta evita tambe cu tin victima”, asina Jeannette Richardson-Baars a splica.
Ampliando mas riba e tema, Richardson-Baars a sigui splica cu si un stewardess of steward riba un vuelo ripara algo straño… si e sa kico e señalnan ta cu algo malo por ta pasando… si e ripara e señalnan di un posibel victima of di un victima, e lo por avisa e capitan di vuelo mesora cu na su turno lo por avisa Polis pa asina por atende e asunto manera cu e vuelo aterisa y evita cu lo por tin un caso di explotacion di hende.
Tambe e dos expertonan a bishita diferente hotel rond di nos isla mirando cu rond mundo ta uza hotelnan pa haci e transaccion di explotacion, o sea, e negoshi ta wordo haci den camber di hotel. “Momento cu nan yega nan ta bay keda den un hotel. Tin cierto señalnan cu por indica cu algo ilicito ta tumando luga. Sea tin hopi movecion di hendenan cu ta drenta y sali for di e camber, no kier servicio di limpiesa di camber of serbete fresco. Si e trahado ta atento e lo ripara esakinan y inmediatamente y asina por bati alarma,” asina e alto funcionario Policial a duna di conoce.
“Esaki ta e informacionnan cu ta forma parti di e training cu nos ta dunando rond di e isla na diferente instancia, organisacionnan como tambe na e publico en general,” di acuerdo cu Jeannette Richardson-Baars. Un di e ultimo luganan cu nan a tene e lectura ta na Scol di Polis dunando e studiantenan informacion pa nan tambe sa kico e ta y con nan por reconoce.
Di su banda e experto internacional, Shamir McKenzie a splica cu desde su yegada nan a bay diferente luga pa splica exactamente kico ta trata di hende y con e por wordo evita. “Awe nos ta na Academia di Polis dunando e aspirantnan training pa asina nan sa y por defini kico traficacion di ser humano ta y asina yuda identifica traficante, cumprado y victimanan. Si nan sa tur esaki nan lo por actua miho riba dje. Pero mas cu tur cos pa medio di e sesion di informacion aki kier mustra nan e complicidad di trafico humano,” asina e experto a remarca.
Ora comparti e informacion, hendenan ta keda den shock cu esaki por ta pasando, specialmente na Aruba. Hendenan ta den shock cu den siglo 21 por cumpra un ser humano, pasobra trafico humano ta explotacion di sernan humano pa ganashi di otro.
“Hopi biaha nos ta kere cu sclavitud ta aboli, pero ainda e ta pasa den siglo 21”, asina Shamir McKenzie a accentua. “Mi mensahe semper ta cu nos mester balora bida humano. E problema aki ta existi pasobra nos no ta balora bida humano mas. Hopi biaha ora puntra hende kico nan ta balora, nan contesta ta famia, yiunan pero e contesta lo mester ta cu bo ta balora bida humano. Nos mester pone atencion na traficacion di hende y no trata nan manera cu nan ta propiedad. Papia cu bo yiunan, hobennan cu esaki ta un problema cu ta existi. Por ta un hende aki na Aruba lo no bira un victima, pero ora nan bay biaha pa for di e isla nan por wordo recluta pa medio di loke nan ta yama lover boys y nan por bira victima di trafico humano y e por ta cualkier persona riba e isla tambe, pasobra e ta posibel tur caminda”, segun Shamir McKenzie a conclui bisando.