Artista contemporaneo Nelson González ta trahando riba un proyecto di arte cu ta di y pa San Nicolas. González ta pidi sosten di e comunidad di San Nicolas pa realisa esaki pero tambe ta haci un apelacion riba sector priva.
Artista Nelson González ta invita tur sector evoca y integra via arte generando patrimonio. E creacion, conservacion y difusion di Patrimonio, semper ta keda den man di comunidad y San Nicolas, sin duda alguno ta e luga perfecto pa esey.
E artista ta preparando e proyecto di arte comunitario titula ‘The San Nicolaas homesickness’. E idea ta pa desaroya esaki na San Nicolas fin di aña aki, den e marco di reapertura di e refineria y conmemora e momento historico aki, cu instalacion di obranan di arte di contacto publico.
E biaha aki, ta un proceso artistico, caminda e realisacion di e pidanan di arte lo wordo treci dilanti door di e comunidad mes, usando nan experiencia den diferente ofishi y pa lo cual nan ta conoci den comunidad. E señora cu ta traha bolo di bruid, e carpinte of un blacksmith, ta algun ehempel.
E practica artistico aki, ta cay bou di un genero di “arte contemporaneo colaborativo”, usa diferente caminda, manera un brug pa comunidad identifica y reconoce su potencial creativo, alabes identificacion entre hendenan, su habitat y su formanan expresivo. Esaki lo ta linguistico y oral, visual of di tarima, sin exclui niun medio artistico.
Nelson a concentra su concepto riba e “nostalgia di un pueblo.” Den e caso aki ta San Nicolas, caminda su persona a desaroya pa hopi aña diferente proyectonan. Despues di intervencionan na Cuba, Venezuela, Colombia den un recorido den Caribe Spaño e artista kier introduci e propuesta aki riba diferente sector financiero, comunidad en general pa por logra e idea. San Nicolas merece esey.
Persona of negoshi interesa den haya mas informacion tuma contacto cu Nelson González via 565 2041, email [email protected] info online na www.nelsongonzalez.org.
Tur sosten ta bon bini!