E piscadonan, ora cu fin di luna yega, nan no por bay na un bancomatico pa swipe, segun sr. Farro, kende ta un piscado. Trahadonan cu tin un salario fiho por sinta tras di un lessenaar y cobra nan salario facilmente. Nan no sa cuanto gasto un piscado tin, nan no sa kico nan ta pasa aden, prome cu nan yega na e punto final di nan placa di luna.
Sr. Farro a sigui splica cu hopi hende no sa kico ta e gasto di e piscado. Tin ora bo ta sali bay lama, b’a hinca 200 y pico florin na gasolin y haas, y no a coy nada. Ora cu yega tera, ningun hende no ta dunabo nada.
Esaki ta un gamble, segun Farro. Esnan cu ta sinta tras di un lessenaar, nan trankilamente, ta haya nan placa facil. Eseynan ta punto cu tin cu tene cuenta cun’e. Prome cu kier pone un punto duro riba un piscado, sinta cu nan, wak ken ta di acuerdo. No hisa un cos benta riba un piscado y bay biba cun’e.
Segun Farro, nan ta implementa leynan cu ta pasa den paisnan grandi y no por trece riba un pida luga chikito asina. Riba e piscadonan chikito, bo no por trece. No por compara un Merca, cu ta un pais grandi cu tin miyones di boto ta sali bay pisca, compara cu por ta Aruba tin 100 boto ta sali bay pisca, cu ta biba di dje.