Andin Bikker, di Partido POR e Plataforma Forsa Nobo, a duna un caluroso bon bini, durante e conferencia di prensa diamars mainta, cu a haci introduccion di otro candidato di POR, cu ta señor Kenny Montero.
Bikker a bisa cu “Un persona no ta un pais y un pais no ta un persona” y el a bisa cu el a wak den e palabranan di Kenny Montero cu el señala, caminda su curason ta, cu e tin hopi pasion pa dedica na diferente tema cu ta biba den pueblo manera e animalnan cu ta riba caya, nos grandinan, nos hubentud y adictonan ambulante, cu ta tematicanan cu ora POR cana den pueblo por mira cu comunidad ta pidi atencion pa nan. Bikker a señala cu pa loke ta trata insiguridad riba nos pais, sigur Kenny Montero ta bin reforsa e team di POR pa restaura e seguridad cu nos pueblo tanto ta anhela. “Pa ocho aña nos ta ripara cu e siguridad di nos pueblo ta completamente ausente, y esnan cu ta na encargo aworaki tin tur atencion riba otro cosnan, pero no ta duna suficiente atencion na siguridad. Pesey mi kier yama bon bini na sr. Kenny Montero cu tur su dedicacion y su pasion pa e temanan cu e tin den su curason pa bin reforsa e team aki, nos Partido POR e Plataforma Forsa Nobo”, Andin Bikker a bisa. Segun Bikker, POR lo dedica atencion na cada un di e aspectonan cu Kenny Montero a menciona, y mas cu tur pa restaura e siguridad pa nos digno pueblo.