NEW YORK CITY, New York – Por lo menos un persona a fayece y otro 22 a resulta herida riba Times Square, ora cu nan a wordo alcansa pa un auto cu a drenta den e plaza aki di New York riba gran velocidad, segun informenan oficial y testigonan.
Un di e testigonan, Hamid el Hamed, a bisa Efe cu e vehiculo a drenta e plaza riba gran velocidad, for di e banda zuid di e ciudad y a dal varios persona prome cu el a dal contra un palo di luz.
Informenan oficial provisional, ta incida cu 22 persona a resulta herida y cu entre e victimanan tin un fayecido.
E zona a keda cordona pa agentenan policial y na e luga tin varios vehiculo policial y di emergencia. E auto tabata riba e plaza, un tiki gekentel y huma tabata sali for di abao di e auto.
Segun fuentenan policial, e accidente aki posiblemente tabata debi cu e chauffeur di e vehiculo tabata bao di efectonan di alcohol.
Autoridad di New York, a identifica Richard Rojas, di 26 aña, como e presunto autor di e accidente aki.
E individuo, di nacionalidad Mericano y bisiña di e distrito di Bronx, a wordo identifica den un rueda di prensa riba Times Square, encabesa pa e alcalde di New York, Bill de Blasio.
E alcalde a confirma cu e fayecido ta un muhe hoben. E presunto responsabel a wordo deteni den ocasionnan anterior pa core auto bao di efectonan di alcohol, e hipotesis cu a tuma pa e caso di awe, diahuebs, 18 di Mei.
Fuente: www.efe.com