Internacional: Por lo menos un persona a perder su vida y dos mas ta perdi despues cu un tankero di petroleo a pega candela serca di costanan di Hong Kong. E candela a cuminza abordo di e tankero cu na e momentonan ey tabata transportando kerosin banda di 11.30 di mainta.
E tripulacion a bula na awa mientras cu e candela tabata consumi e barco. En total 23 di e 26 tripulacion aborda a wordo rescata pa boto marino polis y un curpa sin bida a wordo saca for di lama. Un vocero di Gobierno a bisa cu tres boto di brandweer a wordo manda pa logra paga e candela riba e barco. Pa oranan di atardi ta mustra cu e candela a wordo paga pero e barco tin hopi daño. Esaki ta inclui un buraco grandi riba dek y e heronan tur rond ta dobla, cual ta duna indicacion cu tabatin un explosion. Por mira likido ta core for di e area afecta di e barco pero no ta conoci ki clase di likido e ta.