HOPE, Indiana – Un potret nobo y impresionante ta mustra un muhe di Indiana fo’i tino tras di stuur di un auto, despues di un aparente overdose di heroina cu un hangua den su man.
Asina ta caminda cu exactamente polis a haya Erika Hurt di 25 aña di edd, den un parkinglot diasabra na Hope, Indiana. Loke mas ta inkietante ta e hecho cu su yiu di algun luna a wordo haya ta yora parti patras di e auto.
Segun un comunicado emiti pa e Departamento di Polis di Hope, e agentenan a bisa cu nan a duna Hurt dos dosis di narcan, un droga cu ta wordo uza pa reverti un overdose di narcotico den un situacion di emergencia. Despues el a wordo hiba na Columbus Regional Hospital.
Una bes libera, el a wordo manda prizon di e condado di Bartholomew y acusa di negligencia di menor y posesion di droga.
“Si e muhe aki no a cay flauw y a purba di core auto inmediatamente, e por a haya un accidente riba caminda, por a cay flauw dos minuut despues y dal cu su auto cu su yiu aden, matando tur hende,” e comisario di Polis Matthew Tallent, a bisa CNN.
“Ta impresionami pensa esey.”
E yiu di 10 luna di Hurt ta biba actualmente cu su wela, kende a ricibi e tutela di Servicionan di Menor.
“Mi ta kere cu ta un situacion hopi tristo con e muhe a pone su yiu aden,” Tallent. Hurt ainda ta deteni for di diahuebs den e prizon di e condado y e no por a ricibi un comentario di dje. No a presenta cargonan formal dilanti tribunal di e condado y ni Tallent ni un empleado di corte tabata sa diahuebs, si Hurt tabata tin un abogado of no.
E historia di Erika Hurt ta cuadra den un patronchi scur, manera cu e investigacino ta mustra e uzo di heroina ta aumentando na Merca. E mas reciente informe Mundial di droga di Nacionnan Uni, a haya cu 914 persona di 12 aña di edd of mas, a informa cu nan a consumi heroina na 2014, un aumento di 145% desde 2007. Mortonan relaciona cu heroina a aumenta cinco biaha desde 2000.
A medida cu e cantidad ta sigui aumenta, e potretnan manera esun di Hurt, ta sali na luz di dia cu creciente regularidad. Aunke e ta causa conmocion, tambe por wordo uza pa yuda crea conciencia riba e epidemia di abuso di droga na Merca.
Fuente: CNN en Español