Tin accion grandi ta tumando luga pa loke ta luga di cuminda, pa cual a cuminsa sera algun caba pa e luga por drecha su problemanan segun Sra. Yvette Geerman di Departamento di Higiena.
Tin algun localidadnan cu a wordo cera na mas di un biaha, pero tambe tin diferente localidad cu no ta wordo cera door di Salubridad Publico, pero door di otro departamento. Dus tin cierto localidadnan cu a wordo cera hunto cu e team, pero cu no ta Salubridad Publico a cer’e, e ora ta un otro a cer’e. E ora ey no ta dos of tres biaha Salubridad Publico a cer’e. Y nan tin atencion pa esey.
Ademas di cu e ceramento di e localidad, e ta un sancion hopi pisa, pa ora cu cera un localidad. Lo mester bay traha ariba otro direccionnan. Mester cuminsa cu e datanan cu nan tabata tin anterior y compara cu esun actual. Y e ora lo wak den ley, pa wak e posibilidad, cu lo por revoca un permiso. Pero esey ta un sancion hopi pisa.
Sra. Geerman a sigui bisa, cu como Salubridad Publico lo mester bay evalua con ta haci’e na e miho forma. Lo keda duna informacion mas hopi cu ta posibel. Departamento di Salubridad ta haya cu ta importante pa e doñonan di negoshi, con pa trata cu cuminda. Y esey ta importante pa salud di hende, cual ta keda un prioridad.
Tin varios luga cu a yega di wordo cera na mas di un ocasion door di Departamento di Salubridad Publico mes, y despues di algun dia, nan ta bolbe habri. Tambe tin e parti di Caarchi Berde, y te ainda tin localidadnan cu ta wordo cera pa 48 ora, dus 2 dia. Nan ta haya un multa, y tin diferencia di pensamento, entre multa y ceramento di localidad. E multa por ta hopi minimo y kisas esey no tin efecto. Pero e ceramento di un luga, ta hopi pisa. E luga ta keda cera y e no ta haya entrada pa dos dia. Apart di esey, su nomber tambe ta keda atacha, segun Sra. Geerman, pero esey ta keda nan responsabilidad.
Pero si lo mester bay traha ariba e parti di multa, pero e otro stap lo mester ta bay ta cu na momento cu bay haci comparacion di cifranana di tur e añanan, lo mester bay over na revoca e permiso. Pero esey ta keda den man di minister, y e ta e unico cu por revoca un vergunning. Departamento di Salubridad Publico, lo por duna conseho, pero internamente lo mester bay traha ariba e forma con lo bay trata un localidad cu enberdad no ta cumpli mas. Pero mester corda cu, cerando un localidad pa 48 ora, ya caba ta un sancion hopi pisa.
E ta un cuestion di controla localidadnan. Cada ken tin nan responsabilidad y nan no tey 24 ora tur caminda. Nan ta haci nan maximo esfuerzo, di controla e localidadnan e momentonan cu enberdad cu nan no ta cumpli, tuma sancionnan cu mester tuma na e localidadnan.
Fuera di esey, segun Sra. Yvette Geerman, ta responsabilidad di cada luga pa tin nan luga na ordo. Ta tratando cu salud di hende. Un otro rol ta e comunidad mes, e consumidor mes. Keda semper critico. Al fin al cabo, ta abo ta esun cu ta bay come e cuminda.
Si bo sa cu un localidad no ta cumpliendo cu higiena, bo tambe por dicidi di no cumpra na e localidad ey. Pero, Salubridad Publico ta haciendo nan maximo esfuerzo pa proteha e pueblo akinan, segun Sra. Yvette Geerman, di Departamento di Higiena.