E coronavirus a haya mucho espacio pa plama, segun declaracionnan di prome minister di Hulanda Mark Rutte. Pa e motibo aki un ‘lockdown parcial’ ta necesario. “Si nos cumpli cu e reglanan basico y tur otro medidanan hunto, nos por controla corona”, e mandatario ta enfatisa. Hulanda a caba recientemente di registra 7,305 caso positivo, un caida leve compara cu un dia prome.
Hulanda pues lo drenta un lockdown parcialmente cu tapaboca mandatorio pa un periodo di cauter siman cumisando diaranson 10pm pa purba na reduci impacto riba sector di cuido, pa asina cuido cu no ta relata na coronavirus y covid-19 por continua. Hulanda no kier ripiti locual nan a experiencia durante luna di Mei, pues nan a opta pa un lockdown parcial.
https://www.facebook.com/ministerpresident/videos/382681693100853/
Restriccionnan nobo, manera ceramento di bar y restaurant, cancelacion di deporte y prohibicion di tur otro evento tambe lo ta den efecto entrante diaranson. Esaki ta pa asina purba na bringa e escalacion di infeccion mas fuerte, cual a yega te casi 44 mil siman pasa. Pashentnan total di Covid-19 a redobla den facilidadnan medico den solamente dos siman na 1,410, ekivalente na casi cinco hospital regional completo. Minister di Salud Hugo de Jonge para hunto cu Rutte durante ultimo rueda di prensa a subraya cu e infeccionnan por subi den dos siman si nada no cambia.