Gobierno kier busca un Incinerator pa cuminsa cu e proceso pa remedia Parkietenbos. Minister Otmar Oduber ta splica cu dialuna awo tin un reunion publico den Parlamento. Esaki no ta trata specificamente di Serlimar cu ta parti di e totalidad manera a bin ta trahando riba dje pa por yega n’e punto caminda nan ta cera Parkietenbos por completo y remedi’e.
Desde prome di Juli tin cinco mil ton cu no ta bayendo Parkietenbos mas, sino nan ta wordo paketa y dera na un forma responsabel. E meta ta cu na cierto momento nan ta bay cera Parkietenbos por completo y drecha e area. Esaki tabata un deseo grandi pa cual tabatin debatenan cu tur partido politico a compromete p’esey. Nan tabatin varios departamentonan trahando incansablemente riba esaki.
Awo nan ta preparando pa RFP, caminda Gobierno a tuma e decision pa entre otro pa bay over nan un Incinerator pa por kima e sushi y produci coriente. Nan a palabra cu e ta bay den un sistema financiero di BOO cu ta un sistema cargabel y no ta riba presupuesto. E ta bira manera e caso di molinanan na Vader Piet, caminda nan ta inverti y percura p’esaki draai mientras nan ta produci coriente y Gobierno ta paga p’esaki. Como tambe a tuma e decision pa ubica esaki na Barcadera banda di WEB p’e conectividad. Esaki ta mas fcil pa WEB y menos inversion tin cu tuma luga.
Lo cera Parkietenbos e ora pa baha e ceronan di sushi, tap’ele, pone su tubonancu e por bira un area recreativo manera nan ta haci’e internacionalmente. Aworaki tin hendenan cu ta sugeriendo pa pone un Parke Solar pa produci coriente eynan. Tambe na cierto momento nan ta acercando comercio den e plannan cu tin p’asina comercio por forma parti di e solucion aki pa futuro. Kiermen no solamente ta bay bin cu prijs pa comunidad contribui na Serlimar pa recoge sushi, tene Aruba limpi y procesa e suhsi ey, pero tambe cu comercio tin un rol den esaki y asina por yega na cera Parkietenbos y bin cu un sistema di Incinerator cu nan por uza pa soluciona e problematica aki. Tin mas ideanan cu lo wordo presenta den Parlamento dialuna awo. Lo duna un exposicion di tur e trabounan cu ta tumando luga n’e momentonan aki.
Sr. Oduber ta contento cu instancianan tambe ta di acuerdo cu comercio tin un repsonsabilidad y deber pa ta parti di e solucion di e problematica di desperdicio.