Aruba Tourism Authority (A.T.A) ta comparti tendencia di gasto na Aruba pa Q2 2024, caminda cu Restaurants & Dining ta e categoria caminda cu e bishitante ta gasta mas ora cu e ta na Aruba. Un indicacion cu Aruba tin e potencial di sigui desaroya su oferta culinario y promove esaki mas internacionalmente. Conforme informacion di tarheta di credito visa, unabez du e turista ta na Aruba y ya a regla su estadia y buelo, locual e ta kede genera mas ta locual e ta gasta na “Restaurants & Dining”. Esaki a subi cu 17.9% den Q2 2024, compara cu e mesun temporada den 2023. A.T.A. ta monitorea patronchi di gasto a base di varios estadística entre otro pa medio di visa, master card, encuestanan y Banco Central di Aruba.
Ta di menciona cu A.T.A. ta sigui pone enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, ‘Proteccion y Preservacion di Naturalesa & Medio Ambiente’, y ‘Contribucion Economico na nos isla’. E meta ta pa sigui mantene esfuerzonan den linea segun e balans menciona, y logra aumenta e entrada proporcionalmente mas cu e volumen cu nos destinacion ta ricibi, teniendo na cuenta e 4 pilarnan como tambe capacidad di carga.
ACTUALISACION DEN E INDUSTRIA DI TURISMO:
VOLUMEN (“STAYOVER”) TA CRECE CU 9.4% DEN JULI 2024 COMPARA CU JULI 2023
Conforme e demanda por bai mira tambe cu e aerolineanan lo sigui expande capacidad y asina permitiendo nos captura e demanda. Den juli 2024, Aruba a ricibi un total di 123,437 bishitante “stayover”, esaki ta un crecemento di 9.4%, si compara cu juli 2023, unda a ricibi 112,874 bishitante “stayover”.
MERCADONAN Y CATEGORIANAN DI ACOMODACION
Den juli 2024, 78.5% di e total di e bishitantenan “stayover” pa Aruba a bishita for di Norte America, 4.4% a bishita for di Europa, 14.2% a bishita for di Latino America y 2.8% tawata procedente di otro partinan di mundo.
Mirando e categorianan di acomodacion, den juli 2024 25.7% di bishitante a keda den hotelnan European Plan, 16.7% a keda den hotelnan All-Inclusive, 25.5% a keda den Timeshare, y 32.1% a keda den otro tipo di acomodacion, conoci tambe como short-term vacation rentals
SHORT-TERM VACATION RENTALS (STVR)
A.T.A. tin acceso na un plataforma unda por wak e cantidad di cas, apartamento y villas cu ta wordo uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera. Den 2023, segun un estudio, A.T.A. a logra actualisa inventario di Condominiums existente y condominiums cu actualmente ta na caminda pa realisacion, y lista actualisa di lugar di estadia cu no ta un hotel pero cu si ta disponibel na e turista cu ta keda na Aruba pa un corto tempo.
Si compara juli 2024 cu juli 2023 por wak cu e ocupacion averahe di e acomodacionnan aki a subi cu 4.1 punto di porcentahe, for di un averahe di 46.4% na juli 2023 pa un averahe di 50.5% na juli 2024.
Den caso di entrada, si compara juli 2023 cu juli 2024 por wak cu e categoria a genera un crecemento den entrada di 19.84%.
| Short-term Vacation Rentals | ||||||
| 2019 | 2020 | 2021 | 2022 | 2023 | 2024 | |
| Occupancy | 44.9% | 25.3% | 53.7% | 51.8% | 46.4% | 50.5% |
| Revenue | 5,707,675 | 3,661,607 | 10,328,700 | 12,914,542 | 16,881,174 | 20,231,887 |
| ADR | 167 | 178 | 205 | 233 | 256 | 306 |
2024 (Year to Date)
Te cu juli 2024, Aruba a ricibi un total di 861,128 bishitante “stayover”, esaki ta un crecemento di 17.5% compara te cu juli 2023, unda a ricibi 732,593 bishitante “stayover”. Ora ta yega na lider den mercado, te cu juli 2024, 81.1% di e bishitantenan ta di Norte America, 4.5% ta di Europa, 12% ta di Latino America, y 2.4% tawata procedente di otro partinan di mundo.
Bishita www.ata.aw pa ricibi A.T.A. su ‘Statistical Monthly Report’ tur luna. Pa mas informacion of pregunta por contacta Melanie Kelly na [email protected]
Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta para pa un balanse entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balanse menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.
