Aproximadamente 1000 studiante- y maestronan di scolnan primario y secundario a participa durante e exitoso V Green Education Symposium Aruba 2016 di Biblioteca Nacional Aruba.
Durante e prome siman di V Green Education Symposium Aruba 2016 cual a tuma luga den Biblioteca Nacional Aruba e escritor di 2 buki di agricultura sostenibel pa mucha y orador invita sra. Dianne Venetta di Florida, Merca a duna presentacionnan educativo cu Power Point y workshopnan for di 29 di Augustus te cu 2 di September pa aproximadamente 500 alumno- y maestronan di e siguiente 5 scolnan basico di Aruba: Rosario College na Oranjestad, Mon Plaisir school na Oranjestad, Maria school na Santa Cruz, Colegio Ora Ubao na Tanki Leendert y Prinses Amalia Basisschool na Oranjestad.
For di 5 te cu 9 di September tabata tin 4 orador invita esta Bibliotecario sra. Juneann Gill di Guyana, sra. Anne Frederique di Haiti, sr. Hensley Martina di Corsou y Prof. Dr. Ir. Filomeno (Boey) Marchena di Aruba cualnan a duna presentacionnan educativo cu Power Point y workshopnan na e studiante- y maestronan di e siguiente scolnan secundario di Aruba : Mon Plaisir College (M.A.V.O.), International School of Aruba (High School) , Juliana School (M.A.V.O.), Colegio San Antonio (M.A.V.O.) y Ceque College (M.A.V.O.).
E tema di V Green Education Symposium Aruba 2016 di Biblioteca Nacional Aruba ta : “Sustainable Water Distribution and Organic Food”. V Green Education Symposium Aruba 2016 di Biblioteca Nacional Aruba a wordo organisa conhuntamente cu Fundacion FESTAS, Departamento di Agricultura, Cria y Pesca (Santa Rosa), Elmar Aruba N.V. y W.E.B. Aruba N.V.
Biblioteca Nacional Aruba ta gradici tur e stakeholdernan, scolnan participante, oradornan invita, prensa y e trahadonan di Biblioteca Nacional Aruba cu a contribui grandemente na e exito di e prome lustro di e simposio educativo!
Specialista di Informacion sr. Ronny R. Alders di Biblioteca Nacional ta Coordinator of Green Education Symposiums/Green Education Project di Biblioteca Nacional Aruba.