Un evaluacion di nos turismo; e crisis grandi den nos turismo: Skirbi pa Remigio Wever

Si mi mester kere noticianan den prensa, aki na Aruba pa dos dia largo nos tabatin suerte y nos tabata super feliz.
No tabata referi na e suerte y e felicidad di e 40 trahadonan di casino kendenan recientemente a perde nan trabao den e casino di Hotel Occidental; y sigur ta cu tampoco tabata kier meen e suerte di e 100 trahadonan di Valero, kendenan for di dia 24 di September ta riba caya sin ningun pago di Valero.
Por cierto, mucho menos tabata kiermen e suerte y e felicidad di e tantisimo con-ciudadanonan riba Aruba, kendenan no sa kico nan lo mester cumpra cu nan ultimo debchinan, esta sea cuminda, awa of electricidad.

E ORGANISACION MUNDIAL “UNWTO”
Ora cu cosnan ta bay super malo cu turismo riba Aruba, e ora ey – den bista di e Gobierno y e minister di turismo – lo tin solamente un solucion efectivo pa drecha cos: bo ta organisa cu speed di Speedy Gonzalez un conferencia internacional grandi, y di mes bo ta invita e “UNWTO” – United Nations World Tourism Organization – y otro nombernan grandi y conoci manera UNESCO pa e conferencia aki; claro cu bo ta keda manda tur sorto di bunita mensahenan pa e comunidad di Aruba, y – pa no lubida – tambe pa e autoridadnan y prensa Hulandes, pa na un manera bibo y astuto crea e impresion cu cosnan ta bayendo fantasticamente bon riba Aruba!
Riba dianan 13 y 14 di September Aruba tabatin e gran honor pa scucha e sabidurianan di un tal Taleb Rafai, orador principal durante e “Happiness 360 World Tourism Day”- Conference den Renaissance Convention Center aki na Aruba.
E meneer Taleb Rafai aki, kende ta e secretario-general di e UNWTO menciona mas ariba, tabatin un bunita palabra di elogio pa Aruba; sigui lesa!

UN SONRISA, SUERTE, FELICIDAD Y SATISFACCION.
E meneer Taleb Rafai aki mester a biaha un bon distancia pa bin siña nos aki na Aruba cu un sonrisa riba bo cara ta nifica cu bo ta satisfecho y contento, cu felicidad ta ocasiona un sonrisa riba bo cara, y cu e sonrisa ey na su turno ta demostra bo satisfaccion!
Wel, wel; eseynan di berdad ta sabidurianan y lesnan asombroso y sensacional! Bo no ta haya cu di berdad Aruba tabatin masha hopi suerte cu e meneer Rafai aki a bin Aruba?
Filosoficamente Rafai ta bisa:
“ Felicidad ta un manera di pensa”, y “cu e pensamento ey turismo y cultura mester wordo integra”.
Dispensami, mijnheer Rafai, pero si t’asina bo ta rasona, ta claro cu no ta resta net nada di ningun relacion of conexion entre turismo y cultura.
Mi mester kere cu un sonrisa ta conduci na satisfaccion, cu na su turno ta hibami na felicidad, y p’esey nos mester integra turismo y cultura??
Ki idioma esey ta? Ki clase di sabiduria y disparate e secretario general di UNTO ta pronuncia??
Nan ta parce un “stand-up comedy”! Gran disparate y nonsense!
Pero esey no ta tur! E tal Taleb Rafay a bini Aruba pa pone Pueblo Arubano kere cu Aruba ta canando dilanti riba tereno di integracion di turismo y cultura.
Lamentablemente no solamente mi mester cualifica esaki como disparate, pero pio ainda como mentiranan flagrante.

TURISMO Y CULTURA
Por supuesto turismo y cultura ta bay man den man cu otro, pero esey no ta nada nobo. Esey no ta un descubrimento nobo di Taleb Rafai, ni di minister Otmar Oduber; semper esey tabata asina!
Minister Otmar Oduber a descubri e solucion pa e turismo cu ta bayendo atras rapidamente, y ta bisa:
“INTEGRACION DI TURISMO Y CULTURA TA E FUTURO”

Mi ta ripiti: un disparate y un nonsense!
Turismo, cultura y naturalesa semper tabata relaciona cu otro, pero nunca nos aki na Aruba a haci algo cu esaki; di otro banda nos no tin mucho di ofrece tampoco riba e tereno aki.
Aruba mester a percura pa entretenimento y “gezelligheid” pa motibo di e simpel hecho cu nos no tin mucho di ofrece na cultura y naturalesa, manera Cuba, Colombia, Jamaica, Mexico y Republica Dominicana.
Pero ta di lamenta cu aki na Aruba nos no ta haci uso di e posibilidadnan di entretenimento y bon ambiente, manera shownan cu mariachi, musica di salsa, shownan di flamenco y tango, ni di e talento y e orkestanan di Arubaanse Muziekschool den Cas di Cultura.
Laga nos ta honesto cu nos mes, y admiti cu na Aruba no tin bastante cos pa haci, no tin bastante entretenimento y bon ambiente; mester por bin mas “gezelligheid” y entretenimento pa nos turistanan, y den e ultimo 7 añanan minister Otmar Oduber no a haci nada al respeto.
Den e luna di september aki ta parce cu no tin bida riba Aruba, bo no weita e turistanan, y Caya Betico Croes ta muribundo!

CUBA
Unda e turistanan aki a keda? Nan ta na Cuba; imaginabo: 120 buelo diario for di 8 ciudad grandi na Merca, di cua 20 buelo rumbo Habana, Cuba!
Y awor minister Otmar Oduber ta bin cu integracion di turismo y cultura!
Minister Oduber, esey ta mucho poco, y mucho laat!!

TURISMO DI ARUBA TA COMPLETAMENTE NA WERKI, Y TA ABO TA RESPONSABEL PA ESEY; 7 AÑA DI MAL MANEHO (“WANBELEID”);
TRISTO Y ESCANDALOSO, UN BERGUENSA !!

Remigio A.R. Wever, 42.10.01.44
Ex-director ATA
September 24, 2016

Comments

comments