BRUSSEL, Belgica – Parlamento Europeo a habri un investigacion contra e polemico diputado Polaco Janusz Korwin-Mikke pa e comentarionan sexista cu el a haci diaranson dilanti pleno Eurocamara. Korwin-Mikke a defende e gap salarial entre homber y muhe, hustifica, segun e, pa e “inferioridad” femenino. E comentario, cu a motiva un pelea cu e parlamentario socialista Spaño, Iratxe Garcia, por cost’e desde un “advertencia te na un multa y un suspension temporal.”
“Bo sa cuanto hende muhe tin entre e prome shen hungadonan di ahedres? Mi ta bisabo: ningun. Por supuesto, muhenan mester gana menos cu hende homber, pasobra nan ta mas debil, mas chikito, menos inteligente,” e Euroesceptico Korwin-Mikke a bisa, kende no ta afilia na ningun partido politico.
“Mi sa cu e ta haci dolor y ta preocupabo cu awendia muhenan por ta representando e ciudadanonan den igualdad di condicionnan cubo. Ami ta bin aki pa defende e muhenan Europeo di hombernan manera abo,” Iratxe Garcia a responde.
Eurocamara ta studia si e mester wordo sanciona
E presidente di e institucion, Antonio Tajani, a dicidi di habri un investigacion riba virtud di e articulonan 11 y 166 di e reglamento di e Eurocamara, cu ta exigi pena di sancion, cu ta e conducta di e diputadonan Europeo ta basa riba “respet mutuo” y cu no ta recuri na e “lenguahe of comportacion difamatorio, racista of xenofobo den e debatenan Parlamentario.”
Si e investigacion caba den castigo, lo ta di dos biaha cu Korwin-Mikke di 74 aña resulta sanciona pa e Eurocamara. Na 2015 el a haya su mes ta paga un multa di 3060 Euro y a prohibie durante dies dia di tur actividad Parlamentario, hunto cu e Eurodiputado Italiano di e ultraderechista Liga Norte, Gianluca Buonanno, door di efectua e saludo Nazi den un invervencion Parlamentario.
Fuente: http://www.rtve.es
