TURIN, Italia- Polis Italiano a bisa cu mas di 1500 persona a resulta herida na Turin, un ciudad noord di Italia, ora cu un zonido manera un explosion a provoca un estampida riba e plasa San Carlo, diasabra anochi.
E fanaticonan di e ekipo di futbol, Juventus tabata riba e plasa ta wak e partido di e final di Champions League.
Durante e transmision den e di dos tempo, a skucha un zonido y rumornan a cuminsa core di cu lo tabata tin un explosion.
Segun informenan, e zonido a wordo causa door di fuegonan artificial.
E publico a core sali for di e centro di e plasa San Carlo y hopi a wordo gepress contra di e bareranan cu tabata tin rond.
Tas y sapatonan a keda tira rond riba suela.
Mayoria di e heridonan tabata tin cortanan na pia y brasa.
Pero al menos shete persona ta hospitalisa ainda, entre nan un mucha di shete aña y cu ta ricibiendo tratamento pa lesionnan grave.
Pa algun fanatico di Juventus, e incidente a trece recuerdonan traumatico di e tragedia cu a sosode den e stadion Heysel, di Brussels, al 1985, unda cu nan ekipo a gana e final di Champions League contra di Liverpool.
Un grupo grandi di Hooligansnan Ingles a causa morto di 39 persona, mayoria di nan Italiano, cu a wordo placha contra di un muraya cu despues a colapsa.
Fuente: www.bbcmundo.com