ACCRA, Ghana – Algun defraudado cu a presenta como agentenan consular, amantene durante dies aña un embahada falso Mericano na Accra, capital di Ghana, caminda cu nan tabata imprimi y entrega visanan falso, Departamento di Estado a informa dialuna.
Vocero, Mark Toner, a indica cu ningun hende a drenta Merca cu un di e visanan falso aki, reproduci for di documentonan real obteni pa e estafadornan aki.
“Awendia ta hopi, hopi dificil falsifica visanan Mericano, pasobra e operacion a fracasa,” Toner a sigura.
Ora cu el a wordo puntra riba e capacidad di e delegacion diplomatico falso aki pa funciona durante asina hopi tempo, e vocero a splica cu e victimanan di e fraude aki tabata demasiado bergonsa pa denuncia.
“Nan a wordo engaña, pero un hende no ta core bay polis pa bisa cu el a haya un visa falso mericano ilegalmente,” el a señala.
Di acuerdo cu un documento di luna pasa di e Departamento di Estado, e embahada falso aki no tabata ricibi bishita, sino cu su empleadonan ta wordo desplasa den regionnan remoto di Africa occidental pa capta potencial cliente.
E “personal” di e embahada, gangsternan Turco y Ghanes, tabata manda nan clientenan pa Accra, tabata hincanan den un hotel y tabata cobranan te cu 6000 (5575 euro) pa e documentonan falso.
E potretnan di e embahada falso aki ta mustra un parti di e edificio cu un potret tristo di Barack Obama riba muraya.
Di contrario, e embahada Mericano berdadero, ta ubica den un imponente edificio di un bunita bario di Accra, cu security y rondona pa otro sedenan diplomatico. Un informador a alerta tambe na autoridadnan local riba un embahada falso Hulandes na Accra, caminda cu tin un investigacion en marcha, vocero di e Ministerio di Relacionnan Exterior di Hulanda, Daphne Kerremans, a splica.
Fuente: AFP