Berlin- Un aquarium masha grandi mes a kibra den un hotel na Berlin lagando den e hotel un desaster y e cayanan den bisindario bou di awa.
E ta un aquarium cu tin e nomber “AquaDom”, cu a carga 1500 pisca y tabata midi 14 meter di halto y su forma tabata cilindrico. Di e incidente aki dos persona a keda herida dor di e cristalnan di aquarium. Mirando e desaster cu a keda den e hotel, tur bishitante di e hotel mester a haya un otro hotel unda pa keda pasa nan dianan di vacacion.
E causa pakico e aquarium a rementa no ta conoci. Bomberonan cu a presenta na e sitio a check pa mira si no tabata tin algo cu por a causa cu e aquarium a kibra y rementa, pero no a haya nada cu por a causa esaki.
“AquaDom” a wordo inaugura na december 2003 y tabata tin e record mundial den “Guiness Book of Records” pa ta e aquarium cilindro mas grandi di mundo y pa contene mas di 100 diferente tipo di pisca. Tempo cu e aquarium a wordo construi el a costa 12.8 miyon di dollar. E “Aquadom” a bira un atraccion tanto pa turista cu ta bishita e hotel y pa residentenan di Berlin.