Tur ciudadano tin e obligacion di notifica ora nan ta cambia di adres, segun directora di Censo, Sharin Luydens.
E ta sigui splica cu segun Landsbesluit Bevolkingsregister, ora bo cambia di adres, ora bo bay biba afo of tin cambio den bo estado civil, tin cu wordo notifica na Censo. Censo mester tin e adres corecto y e obligacion ta pa nan haya e adres corecto ey como un bon ciudadano y segun reglanan.
Segun Luydens, por cambia di adres online. Ta bay www.censo.aw, ta pone si ta huurcontract, Censo ta cambia e adres. Si ta pidi cierto rekisito, segun Luydens. Pakico? Pasobra mester proteha tambe e doño di e cas pa no ken cu ta bin registra na su adres. Manera cu sa, hopi biaha e tabata pasa y awo a bin cu cierto reglanan pa proteha e doño di cas.
Tin un proyecto nobo na caminda pa ora un hende sali di Aruba of kita su nomber for di Censo tur informacion lo drenta pa tur departamento cu mester di informacion di hende segun Luydens.
Nan tin un modulo cu lo wordo acopla cu IASA, caminda Censo lo bira e unico leverancier di IASA, pero e lo bira leverancier cu otro departamento tambe. Si por ehempel un ciudadano mester schrijf uit awe, AZV lo haya e informacion ey realtime, cu nan por cera e polisa e ora ey. Tambe cu si mester bay cu un aña afo y e sistema lo reconoce cu e persona aki ta inscribi tin mas cu un aña afo y e señal ey lo wordo manda automatico. Pero ta un proyecto cu lo bay desaroya y tambe ta wordo subsidia pa fondo di desaroyo den e proximo lunanan.