Arte den su totalidad ta masha hopi menciona den e ultimo tempo na Aruba. Despues di un exitoso demostracion di mas di 150 artista uni pa un solo meta durante Aruba Art Fair, por ser deduci cu Arte ta mas bibo cu nunca den e mente di e hoben cu ta orientando y creando su destinacion pa su futuro atrabes di su estudio.
Arte contemporaneo, arte plastico, sculturanan, weaving, fotografia, short films, baile, musica, y mucho mas ta posibilidadnan cu ta den e hoben su mente y con pa yega na esaki tabata e intencion di decano Eunice Thijssen di Colegio San Antonio na momento cu e a participa cu un grupo di 27 studiante durante e “Beroepen Orientatiedag 2016”, caminda alumnonan a haya informacion y sera conoci cu diferente profesion. 27 studiante hunto cu nan mentor, Juffrouw Milly, a haya un rondleiding na San Nicolas y asina mira e muralnan di cerca y haya un workshop di artistanan cu a traha durante Aruba Art Fair.
Colegio San Antonio ta conoci pa nan innovacion y dedicacion na Arte y Cultura. Ta bibo den nos mente nan participacion exitoso na Good for the Neighborhood na unda nan a presenta trabaonan traha cu palonan recicla.
Pero tambe como scol a sa di entrega un canvas di mas di 2 meter masha bunita acaba y pinta pa e projecto di Art Expression di Aruba Art Fair.
Tur aňa e eerste y tweede klassers ta bishita un empresa pa conoce e posibilidadnan di escogencia di profesion prome cu nan dicidi riba nan vakpakket. Mientras cu duante e mesun dia aki e derde y vierde klassers ta haya for di expertonan den comunidad presentacionan di con nan a logra nan metanan y cual estudio nan a sigui pa logra esaki.
Durante di e recorido Director di Aruba Art Fair, Tito Bolivar a splica e diferente tecnica y artistanan cu a bishita Aruba y cu a laga nan obranan atras. Pero tambe con a yega na e idea di inclui scolnan manera EPB y EPI den un competencia Culinario cu ta hasi cu awor 4 alumno lo biaha otro aňa pa Hulanda pa sigui un workshop na ROC Mondriaan Den Haag.
E hoben talentoso Natusha Croes, gradua na Rietveld Academie a ilustra posibilidadnan in imaginabel di un carera den e mundo di arte, mientras cu e artista Argentino, biba na Aruba, Maria Onni a elabora riba e diversidad di trabaonan cu Arte y cultura ta trece cune.
Un di e profesionnan exitoso den e mundo aki por ehempel ta e estudio di Social Cultural Antrophology cu no solamente ta duna e hoben e oportunidad pa explora e aspectonan cultural y social di un pais pero tambe con arte ta uni un nacion.
Colegio san Antonio ta consisti di un team dinamico y profesional cu lo kier sigui traha na bienestar di e enseňansa y su alumnonan y asina yuda e alumno pa logra e lugar cu e merece den comunidad. Y esaki ta wordo evalua tambe pa e ratio di exito di 84% di alumnonan cu ta gradua cu exito.
Pa tur esunnan cu ta interesa den workshop innovativo y diferente di e diversividad di Arte por yama ArtisA na 5934475.