Diasabra, 29 di October, Fundacion Muchila Creativo a organisa un Festival di Arte y Cultura den centro di Oranjestad.
E evento aki a ser organisa en conexion cu e luna di enseñansa. Alabes e la duna e comunidad di Aruba e oportunidad pa participa na e evento special aki y nan por a siña mas di e diferente disciplina di Arte y nos Cultura.
Den diferente area por a disfruta di musica, baile, teatro, arte visual y multi- media. Riba Plaza Daniel Leo, Alfonso “Buchi” Boekhoudt, a toca su caha di orgel y a deleita esnan cu tabata crusa e Plaza cu su musica. Tanto turista como localnan a para un rato pa scucha e charla di e origen di caha di orgel. Nan a haya splicacion riba nan preguntanan y alabes nan a haya un momento pa experiencia con pa toca riba e instrumento tipico Arubano aki.
Despues di e bunita presentacion y demonstracion di nos caha di orgel, a sigui presentacion di, MUSIC BOX, ariba podium di Plaza Daniel Leo, bou direccion di Mattijs Spaltman, un musico conoci y respeta na Corsou, cu tabata un invitado special na e Festival di Arte y Cultura. Matthijs, no ta domina solamente percusion, pero otro instrumentonan tambe. Despues di un presentacion cu algun otro percusionista Matthijs a sigui cu su tayer di Music Box, caminda participantenan a ser invita pa participa y uza nan curpa, palitos y un cahon, pa crea ritmonan percusivo, varia, simpel y complica. E tayer interactivo aki tabata completamente non-verbal y tanto adulto como mucha di diferente edad a participa cu hopi animo y alegria, incluyendo un famia di cuater persona.
Percusionista, Remigio Rasmijn a termina e parti di e programa riba Plaza Daniel Leo, cu un “Djembe Jam” y a cera forsa cu Matthijs Spaltman di Corsou pa presenta un experiencia percusivo di kita sombre. Durante e tayer, a invita publico pa subi stage y participa den e tayer interactivo aki, caminda nan a siña algun ritmo y “jam” cu e profesionalnan den estilo Africano manera “Call and Response”.
Como culminacion e drumband ‘Prodigy’, cu ta existi completamente di damanan, a subi Plaza Daniel Leo, na final di e “Djembe Jam” y a cuminsa toca bou di direccion di Remigio Rasmijn. E integrantenan tabata integra un coreografia, cu a pone tur hende move. Grupo di Baile ‘Empire’ a traha un coreografia cu palonan pinta riba e musica. Masha impresiona pa wak.
Riba un señal di nan lider, tur musico y bailarinanan a subi riba Caya Betico Croes, sigui pa e publico, cu tabata scucha y a gosa di e ambiente. Tur hende a join e parada den Caya Betico Croes direccion pariba pa culmina na Plaza Nicky Habibe. Y poco poco, pero cu hopi fanfaria, e parada a sigui door di Caya Grandi tur uni den zonido di ritmo y coreografia.
E parada a pasa banda di e Zona di Baile, – na skina di Aldo – caminda entre 4:00’or – 7:00 PM tabatin varios estilo di baile y tayer. Manera Salsa cu ‘Pachanga’, Tango cu Rafa Oliana, Capoeira di Brazil cu Marlon Matthew, y Baile Contemporario Urbano, cu Grupo Empire Dance. Tur e bailenan a ser coordina pa Mayra Stroeken, docente di baile na IPA. Mayra ta forma parti di ekipo di Muchila Creativo.
Na e mesun momento, Jhon Fredy Montoya, un artista di teater local conoci, a presenta un tayer teatral y a introduci artistanan di teater y popchi di Cuba, cu ta di bishita na Aruba pa Intercambio Teatral 2016 Aruba-Cuba pa un luna largo pa duna tayer riba nos dushi isla.
Na altura di ex-Bon Bini Bazaar, artistanan Visual, Frans Lacle, docente di Arte Visual na IPA y King Lie-Kwie, docente na Atelier ‘89, a ofrece oportunidad na esnan cu kier a pinta of traha mascarada.
Finalmente, na edificio di Muchila Creativo, Rebecca Roos, productor, director y cineasta conoci den e mundo di pelicula aki na Aruba, (AIFF) y Idris Boekhoudt, respectivamente a duna un tayer di e base con pa traha un video y con pa compone un jingle.
Riba Plaza Nicky Habibe, participantenan por a saboria di un dushi sopi oester di Patrick Maduro, y Seafood Crioyo, di Chef Andrew Tromp, cu a cay na smaak di un y tur. Den caya grandi tabata tin varios tent di cuminda, boca dushi y bar di Mary Joan Foundation, (pa recauda fondo).
‘Muchila’s Houseband’ a entretene e publico pa un ora, despues cu e parada a yega su destino y prome cu a cuminsa cu Karaoke, cual tabata e parti final di e anochi.
Hopi hende a probecha pa canta nan canticanan faborito cu apoyo y sosten di aplauso di e publico.
Na final di e anochi tur hende a bay cas contento, pasobra nan a haya un chens pa participa den diferente tayer interactivo, y por a gosa di e cuminda, bebida, presentacion y tayernan cu varios disciplina di arte y nan por a descubri nan talentonan scondi. Y tur esaki tabata completamente GRATIS!
Tambe mester menciona cu tres studiante di IPA, cu ta den nan ultimo aña, a yuda cu e evento aki. Justy Lopez y Rochene Dirksz como nan SPR Project y Celienne Tromp cu su VSP Project. Nan participacion tabata indespensabel, cu nan experiencia riba nivel tecnico den filmacion y fotografia, cu guia di profesionalnan, pa un documentario di e Festival di Arte y Cultura
Directiva di Muchila Creativo, Rose-Marie Provence, Emerita Emerencia y Patrick Maduro, kier gradici (Directie Cultuur) DCA, Ministerio di Enseñansa, pa nan sosten. Tambe tur e sponsornan, IBS Samsung, Aruba Bank, Arubus / Aruparking, Elmar, Andina Ice, IBISA, Zoom Aruba y tur e boluntarionan, Stanley de Marchena, Derrick Koolman, y tur famianan.
Un danki di curason na tur esnan cu a yuda y haci e Festival di Arte y Cultura posibel y exitoso den centro di Oranjestad y tur esnan cu a celebra hunto cu Muchila Creativo, e Festival di Arte y Cultura den cuadro di e luna di Enseñansa.