Comisario di Rey na Limburg cu tambe ta carga e nomber di Gobernador di Limburg Emile Roemer a duna Minister Plenipotenciario mr. Ady Thijsen un caluroso bon bini na e Provinciehuis na ocasion di un bishita oficial. Sr. Roemer a duna minister Thijsen un tour cortico den un exposicion permanente na e Provinciehuis como conmemoracion di e firmamento di e Tratado di Maastricht na 1992, cu ta e fundeshi di e Union Europeo cu nos conoce awendia. Tambe e exposicion ta contene otro aspectonan manera e introduccion di e euro cu tambe a tuma lugar na Maastricht y di e Brexit.
Den su oficina e combersacion entre Gobernador Roemer y Minister Thijsen a bai riba temanan actual di Aruba cu tin similaridad cu Hulanda, cu ta scarsedad di vivienda, “vergrijzing”, scarsedad di trahador y profesionalnan local. Minister Thijsen a splica cu meta di su combersacion cu municipionan (gemeentes) y provincianan na Hulanda ta pa mira pa yega na maneranan di cooperacion, den caso di Limburg riba e tereno di “entrepreneurship” y enseñansa. Minister Thijsen: ‘Mi ta boga entre otro pa mira unda Aruba por haya cooperacion riba e tereno di agricultura. Mi ta convenci cu Aruba por produci agricultura pa e mercado local y tambe pa abastece e hotelnan na Aruba. Mi ta papia cu hopi hoben cu ta desea di bai den e ramo di agricultura, pero ta desea di ricibi e sosten y conocemento pa ta exitoso den esaki. Cu technologia innovativo mester por tin productonan cu por crece na Aruba. Awor aki casi tur fruta y berdura ta wordo importa,’ asina Minister Thijsen a bisa.
E mandatario a bisa Gobernador Roemer cu e sector economico principal di Aruba ta turismo, pero cu esaki ta hopi vulnerabel. ‘A consequencia di Covid y e lockdown, Aruba a experencia un temporada sumamente dificil. Nos mester diversifica nos economia y esaki a bira un prioridad grandi pa Gobierno di Aruba. Na otro banda loke ta un punto importante ta cu Aruba tin un experticio grandi riba tereno di turismo, cual experticio Aruba por yuda Limburg den dje como un provincia cu tambe ta depende hopi di turismo,’ segun e mandatario Arubiano.
Minister Thijsen a bisa cu e ta traha dura pa expande su network pafor di Den Haag. Banda di e municipionan y provincianan, tambe e ta hiba combersacion cu entre otro organisacionnan di empresa manera MKB Nederland, cu hogeschool y universidadnan. Tocante esaki Gobernador Roemer a conseha minister Thijsen pa bishita e bolsa di arte TEFAF cu ta tuma lugar tur aña den luna di maart na Maastricht pa akinan topa y papia cu personan clave den sociedad di Hulanda. Tambe sr. Roemer a conseha e mandatario pa tuma contacto cu Greenport campus na Venlo y eventual tambe cu Chemelot campus na Sittard cu ta mas specialisa riba e industria petrochemico. Esaki relaciona cu plannan pa cu e refineria na San Nicolas. ‘Pa stimula y desaroya “entrepreneurship” entre hobennan na Aruba of hobennan Arubiano bibando na Hulanda, lo mester mira na maneranan pa bin cu intercambio cu scolnan MBO y HBO of tambe Universidad,’ asina Emiel Roemer a bisa.
Finalmente Minister Thijsen a gradici Gobernador Roemer pa e hospitalidad y e combersacion ameno. Despues a sigi un intercambio di regalo como recuerdo di e bishita di minister Ady Thijsen na Gobernador Emile Roemer di Limburg.
