Sr. Ferdinand Ponson, vocero di Brandweer ta resumi aña 2017 caminda cu nan tabata tin 868 caso cu mester a wordo atendi pa Brandweer.
E cifra aki ta di e total di melding unda cu Brandweer mester a actua. Tambe nan a atende mas di 500 casonan di candela di mondi, candela den barinan di sushi etc. Un total di 78 caso di candelanan di edificio, esaki ta tanto cas y tiendanan, como tambe hotelnan. Den e casonan aki tabata tin lekkage di clorina. Y tambe 176 asistencia duna, cual ta accident di auto, hende a keda sera den cas, muchanan cu ta hunga den heki y nan ta keda pega, cachonan cu ta cay den poz, etc.
Riba airport tabata tin 6 melding total na 2017. Mester bisa cu e porcentahe aki ta hopi abao y ta algo di alegra, cu no tabata tin hopi incidente ariba airport. Pa loke ta trata botonan na candela, ta trata di 3 boto na candela, unda cu Brandweer mester a drenta den accion pa combati e candelanan aki. Tur esakinan ta botonan cu tabata ariba tera caba y si tin un boto cu ta kimando ariba lama, nan lo traha hunto cu Polis Maritimo, Warda Costa pa tur actua hunto y combati e candela aki.
Sr. Ponson a sigui bisa cu nan mester a haci hopi campaña pa edificionan tin nan sistema di alarma up to date. Tambe Brandweer ta trahando cu e hotelnan y por bisa cu esaki ta bayendo hopi bon. Tin un porcentahe halto di cushina den negoshinan, cu durante control ta sali afo cu no tin sistema di alarma bon. Nan ta bezig ta trahando bon cu Brandweer durante henter e aña, pero lo bin cu’n campaña pa tur hende ta consciente di siguridad den nan establecimento y cu esaki ta na ordo, segun Sr. Ferdinand Ponson, vocero di Brandweer.